គណៈកម្មការអប់រំ យុវជន កីឡា ធម្មការ កិច្ចការ- សាសនា វប្បធម៌ និងទេសចរណ៍ នៃរដ្ឋសភា ដឹកនាំដោយ ឯកឧត្តម យ៉ែម បុញ្ញឫទ្ធិ ប្រធានគណៈកម្មការ បានទទួលជួបពិភាក្សា ការងារជាមួយ លោកជំទាវ ភឿង សកុណា រដ្ឋមន្ត្រី ក្រសួងវប្បធម៌ និង វិចិត្រសិល្បៈ នៅវិមាន រដ្ឋសភា នារសៀល ថ្ងៃទី២៦ខែវិច្ឆិកា ឆ្នាំ២០១៤ ដើម្បីឆ្លើយបំភ្លឺ ដល់គណៈកម្មការ- ជំនាញ រដ្ឋសភា ពាក់ព័ន្ធនឹងវិស័យវប្បធម៌ នៅព្រះរាជាណាចក្រកម្ពុជា៕
នៅក្នុងឱកាសនោះ ឯកឧត្តម យ៉ែម បុញ្ញឫទ្ធិ ប្រធាន គណៈកម្មការទី៧ បានមានប្រសាសន៍ សាកសួរអំពីបញ្ហាពាក់ព័ន្ធនឹងការប្រារព្ធធ្វើពិធីផ្សេងៗ នៅលើភ្នំបូកគោរបស់ជនជាតិវៀតណាម និងបញ្ហាទុក្ខកង្វល់របស់ជនជាតិភាគតិចនៅតំបន់ ជាយអារ៉ែង ជាដើម។
ទន្ទឹមនឹងការលើកឡើងដូចខាងលើ ឯកឧត្តមប្រធានគណៈកម្មការទី៧ ក៏បានស្នើដល់លោកជំទាវរដ្ឋមន្រ្តី ជួយពិនិត្យមើលផលប៉ះពាល់ វប្បធម៌ និងទុក្ខលំបាករបស់ជនជាតិ ដើមភាគតិចនៅតំបន់អារ៉ែង ក៏ដូចជាការប្រារព្ធធ្វើពិធីផ្សេងៗ នៅលើភ្នំបូកគោរបស់ជនជាតិ វៀតណាម នោះផង។ជាសំណូមពរបន្ថែមទៀត ឯកឧត្តមយ៉ែម បុញ្ញឫទ្ធិ បានស្នើសុំឲ្យ លោកជំទាវ ភឿង សកុណា ដាក់បញ្ចូលក្នុង កម្មវិធីសិក្សា ផ្នែកខាងវប្បធម៌ សិល្បៈ នូវឧបករណ៍ដូរតន្រ្តីបុរាណរបស់ខ្មែរ ចូលទៅក្នុងកម្មវិធីសិក្សារបស់ក្រសួងអប់រំ និងស្នើដល់ក្រសួង សូមយកចិត្តទុកដាក់ទៅលើ ប្រព័ន្ធផ្សព្វផ្សាយទាក់ទងនឹងវប្បធម៌ប្រពៃណីជាតិ ពោលគឺជួយផ្សព្វផ្សាយបានកាន់តែទូលំទូលាយថែមទៀត ជាពិសេសគឺកម្មសិទ្ធិបញ្ញា។
តបនឹងការលើកឡើង របស់គណៈកម្មការទី៧ នៃរដ្ឋសភា លោកជំទាវ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ បានមានប្រសាសន៍ថា រហូតមកដល់ពេលនេះក្រសួង នៅមិនទាន់បានទទួលនូវពាក្យបណ្តឹង រឺឯកសារជាផ្លូវការណា១នៅឡើយទេ ប៉ុន្តែ លោកជំទាវ សន្យាថា នឹងចាត់មន្រ្តីជំនាញពាក់ព័ន្ធ របស់ក្រសួង ទៅពិនិត្យមើលនៅ នឹងកន្លែងដោយផ្ទាល់ ថាតើមានផលប៉ះពាល់ ដល់ទំនៀមទំលាប់ ប្រពៃណីអ្វីខ្លះ នៅកន្លែងប្រារព្ធពិធីលើភ្នំបូកគោ ក៏ដូចជានៅតំបន់ជនជាតិភាគតិចជាយអារ៉ែងដែរ។
ដោយឡែកការស្នើសុំរបស់គណៈកម្មការទី៧ នៃរដ្ឋសភា សូមឲ្យក្រសួង ជួយរៀបចំបញ្ចូល ទៅក្នុងកម្មវិធីសិក្សា ផ្នែកខាងសិល្បៈ នូវឧបករណ៍ តន្ត្រីបុរាណរបស់ខ្មែរ ក្នុងកម្មវិធីសិក្សារបស់ ក្រសួងអប់រំនោះ ក្រសួងវប្បធម៌និងវិចិត្រសិល្បៈ ក៏បាននិងកំពុងស្នើដល់ ក្រសួងអប់រំហើយដែរ។ លោកជំទាវបានបញ្ជាក់ផងដែរថា នៅក្នុងឆ្នាំ២០១៥ខាងមុខនេះ ក្រសួងកំពុងត្រៀមរៀបចំធ្វើការងារ ដែលជាអាទិភាពជាងគេ គឺការចុះបញ្ជី សារពើភណ្ឌ បេតិកភណ្ឌរូបិយ មានដូចជា ប្រាសាទសម្បូរព្រៃគុហ៌ ប្រាសាទបន្ទាយឆ្មារ និងចាប៉ីដងវែងជាដើម៕