ឯកឧត្តម កឹម សុខា អនុប្រធានទី១ រដ្ឋសភា នៃ ព្រះរាជាណាចក្រ កម្ពុជា បានអនុញ្ញាត អោយ ឯកឧត្តម Pitono Purnomo ឯកអគ្គរដ្ឋទូត ឥណ្ឌូនេស៊ី ប្រចាំនៅ ព្រះរាជាណាចក្រ កម្ពុជា ចូលជួបធ្វើសវនាការ និង ពិភាក្សាការងារនារសៀល ថ្ងៃទី១២ ខែវិច្ឆិកា ឆ្នាំ២០១៤ នៅវិមានរដ្ឋសភា។
ក្នុងជំនួប ឯកឧត្តម កឹម សុខា បានមានប្រសាសន៍ លើកឡើងពីសារសំខាន់ នៃ ការបង្កើនទំនាក់ទំនងសាមគ្គីភាព មិត្តភាព និងកិច្ចសហប្រតិបត្តិការ រវាង បណ្ដាប្រទេសនានា លើសកលលោក ក៏ដូចជា បណ្ដាប្រទេស ក្នុងតំបន់ ពិសេសប្រទេស ក្នុងតំបន់ អាស៊ាន ដែលជាអ្នកជិតខាងគ្នា។ ជាមួយនេះ ឯកឧត្តម អនុប្រធានទី១ រដ្ឋសភា ក៏បាន មានប្រសាសន៍ លើកឡើងពី ទំនាក់ទំនង កិច្ចសហប្រតិបត្តិការដ៏ល្អ រវាង ប្រទេសទាំងពីរ កម្ពុជា ឥណ្ឌូនេស៊ី ដែលមានតាំងពីយូរលង់ណាស់- មកហើយ ហើយ ឯកឧត្ដម សូមអោយជម្រុញ កិច្ចទំនាក់ទំនង ដែលមានស្រាប់នេះ អោយកាន់តែប្រសើរឡើង ថែមទៀត ពិសេស ទំនាក់ទំនង កិច្ចសហប្រតិបត្តិការ រវាង សភានៃប្រទេសទាំងពីរ ដើម្បីផ្លាស់ប្តូរបទពិសោធន៍ ពីគ្នាទៅវិញទៅមក ដោយសារថា ប្រទេសឥណ្ឌូនេស៊ី ជាប្រទេស មានប្រជាធិបតេយ្យខ្ពស់ជាងគេ នៅក្នុងតំបន់អាស៊ាន ។
ឯកឧត្តម កឹម សុខា បានជម្រាបជូន ឯកឧត្តម ឯកអគ្គរដ្ឋទូត ឥណ្ឌូនេស៊ីផងដែរថា កន្លងមក ក្នុងគោលដៅ បង្កើនកិច្ចទំនាក់ទំនង នេះដែរ ឯកឧត្តម ក៏បានជួបធ្វើសវនាការជាមួយ បណ្តាប្រទេសនៅតំបន់ សហភាពអឺរ៉ុប ជាច្រើនប្រទេស និងបណ្តាអង្គទូតមួយចំនួន ដូចជា ទូតសហរដ្ឋអាមេរិក ជប៉ុន អូស្ត្រាលី កាណាដា ជាដើម។
ឆ្លៀតក្នុងឱកាសនោះដែរ ឯកឧត្តម កឹម សុខា ក៏បានផ្តាំផ្ញើរ សម្ដែងការអបអរសាទរ ជូនចំពោះ ឯកឧត្តម ហ្សូកូ វីដូដូ ប្រធានាធិបតី ដែលទើបជាប់ឆ្នោតថ្មី របស់ប្រទេស ឥណ្ឌូនេស៊ីផងដែរ។
ជាការឆ្លើយតប ឯកឧត្តម Pitono Purnomoបានថ្លែងអំណរគុណ ជូនចំពោះ ឯកឧត្តម កឹម សុខា ដែលបានលើកឡើងពី សារសំខាន់នៃទំនាក់ទំនងរវាងប្រទេសក៏ដូចជាសភាទំាងពីរកម្ពុជា ឥណ្ឌូនេស៊ី ហើយ ឯកឧត្តម បានសន្យាថា នឹងពាំនាំអនុសាសន៍ដ៏ល្អ ទាំងនេះក៏ដូចជា ប្រសាសន៍ផ្ដាំផ្ញើរការអបអរសាទរ ទៅជម្រាបជូន ចំពោះឯកឧត្តម ប្រធានាធិបតី និង ថ្នាក់ដឹកនាំរដ្ឋសភាឥណ្ឌូនេស៊ី ផងដែរ៕