នៅរសៀលថ្ងៃទី១០ ខែមេសា ឆ្នាំ២០១៤ ឯកឧត្តម ប៉ែន បញ្ញា ប្រធានគណៈកម្មការនីតិកម្ម និង យុត្តិធម៌ បានជួប ពិភាក្សាជាមួយ លោកជំទាវ សឿង រដ្ឋធាវី រដ្ឋលេខាធិការក្រសួងការបរទេស ដើម្បីពិនិត្យពិភាក្សា លើសេចក្តីព្រាងច្បាប់ ស្តីពីការ អនុម័ត លើពិធីសារ នៃធម្មនុញ្ញអាស៊ាន ស្តីពី យន្តការ ដោះស្រាយជម្លោះ នៅវិមានរដ្ឋសភា។
ឯកឧត្តមបណ្ឌិត ប៉ែន បញ្ញា បានមានប្រសាសន៍ ថា គណៈកម្មការ អញ្ជើញលោកជំទាវ ដែលតំណាង ឲ្យរាជរដ្ឋាភិបាល មកប្រជុំនាពេលនេះ គឺដើម្បីឲ្យ លោកជំទាវ មកស្រាយបំភ្លឺ បញ្ហាមួយចំនួន ជូន គណៈកម្មការជំនាញ ពីគោលបំណង សំណូមពរ និងបញ្ហាសំខាន់អ្វីខ្លះ និងភាពចាំបាច់ នៅក្នុងការ អនុម័ត ទៅលើសេចក្តីព្រាងច្បាប់នេះ។
លោកជំទាវ សឿង រដ្ឋធាវី បានមានប្រសាសន៍ ជម្រាបជូន ឯកឧត្តម ជ្រាបថា ពិធីសារនៃធម្មនុញ្ញ អាស៊ាន ស្តីពីយន្តការ ដោះស្រាយជម្លោះ ត្រូវបាន ចុះហត្ថលេខា ដោយរដ្ឋមន្ត្រី ការបរទេស អាស៊ាន ទាំងអស់ កាលពីថ្ងៃទី៨ ខែមេសា ឆ្នាំ២០១០ នៅ ក្នុងឱកាស កិច្ចប្រជុំកំពូលអាស៊ាន លើកទី១៦ នៅ ទីក្រុងហាណូយ សាធារណរដ្ឋ សង្គម និយមវៀត ណាម។
ពិធីសារ នៃធម្មនុញ្ញអាស៊ាន ស្តីពីយន្តការដោះស្រាយជម្លោះនេះ ត្រូវបានរៀបចំឡើង តាមបំណងប្រាថ្នា របស់ថ្នាក់ដឹកនាំអាស៊ាន ដែលមាន ទិសដៅប្រែក្លាយអាស៊ាន ឲ្យទៅជាអង្គការមួយ ដែលផ្អែកលើច្បាប់ ដោយមានជំនឿថា ការមានយន្តការដោះសា្រយជម្លោះ ដែលប្រកបដោយ ទំនុកចិត្ត នឹងជួយអាស៊ាន ទប់ស្កាត់ និងការប្រឈមមុខគ្នា មិនឲ្យរីករាលដាល ក្នុងចំណោមរដ្ឋសមាជិកអាស៊ាន ដោយរក្សាបាននូវ បរិយាកាស កិច្ចសហប្រតិបត្តិការ ដើម្បីកសាងសហគមន៍អាស៊ាន ប្រកបដោយសន្តិភាព និងវិបុលភាព។
ទន្ទឺមនឹងនេះ ពិធីសារនៃធម្មនុញ្ញអាស៊ាន ស្តីពីយន្តការដោះសា្រយជម្លោះ ត្រូវបានធ្វើឡើង ដោយអនុលោមតាមមាត្រា ២៥ នៃធម្មនុញ្ញអាស៊ាន ដែលចែងថា យន្តការដោះស្រាយជម្លោះ សមស្របនឹងត្រូវបង្កើតឡើង សម្រាប់ជម្លោះដែលពាក់ព័ន្ធ នឹងការបកស្រាយ ឬការអនុវត្តធម្មនុញ្ញអាស៊ាន និងលិខិតតុបករណ៍អាស៊ានដ៏ទៃទៀត។
លោកជំទាវបានបន្តថា ក្នុងមាត្រា១៩ នៃពិធីសារនេះចែងថា “ពិធីសារនេះត្រូវផ្តល់សច្ចាប័ន ដោយរដ្ឋសមាជិកទាំងអស់ ដោយអនុលោមតាម នីតិវិធីផ្ទៃក្នុង របស់រដ្ឋសមាជិកនីមួយៗ ហើយពិធីសារនេះ ត្រូវចូលជាធរមាន នៅថ្ងៃបន្ទាប់ ពីអគ្គលេខាធិការអាស៊ាន បានទទួល លិខិតតុបករណ៍ ទី១០ នៃការផ្តល់សច្ចាប័ន។
ក្រោយពីបានជជែកវែកញែក និងពាក្យពេចន៍ ឃ្លាឃ្លោង និងអក្ខរាវិរុទ្ធ ដើម្បីឲ្យស្របនិងទម្រង់ច្បាប់អង្គប្រជុំ បានសម្រេច និងដាក់បញ្ជូលអត្ថបទ សេចក្តីព្រាងច្បាប់នេះ ជូនរដ្ឋសភាធ្វើការពិភាក្សា និងអនុម័តនាពេលខាងមុខ។