ក្នុងឱកាស ដែលរដ្ឋសភា បើកសម័យប្រជុំ លើកទី២ នីតិកាលទី៥ នៅព្រឹកថ្ងៃទី១ ខែមេសា ឆ្នាំ២០១៤ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានមាន ព្រះរាជបន្ទូល កោត សរសើរ យ៉ាងជ្រាលជ្រៅ ដល់រដ្ឋសភា ដែលបាន ខិតខំ បំពេញភារកិច្ច ជូនប្រទេសជាតិ និងប្រជា រាស្រ្ត នាពេលកន្លងមក។
ក្នុងព្រះរាជសារ ផ្ញើរជូនរដ្ឋសភា ដែលអានដោយ សម្តេចអគ្គមហាពញាចក្រី ហេង សំរិន ប្រធានរដ្ឋសភា ក្នុងសម័យប្រជុំរដ្ឋសភា ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះអង្គបានមានព្រះរាជបន្ទូលថា រដ្ឋសភាក្នុងនាមជា ស្ថាប័ននីតិប្បញ្ញត្តិ ដែលសមាជិករដ្ឋសភា គឺជាតំណាងរាស្រ្តដែលត្រូវបាន ប្រជាពលរដ្ឋបោះឆ្នោតជ្រើសរើស ជាសកលដោយសេរី និងដោយសម្ងាត់ មកពីមណ្ឌល ផ្សេងៗគ្នា នៅទូទំាងប្រទេស ដើម្បីធ្វើជាតំណាងនៅក្នុងរដ្ឋសភា ជាអ្នកផ្តួចផ្តើមធ្វើច្បាប់ អនុម័តច្បាប់ និងតាមដានការអនុវត្តច្បាប់ របស់រាជរដ្ឋាភិបាល បានបំពេញតួនាទីរបស់ខ្លួន ប្រកបដោយប្រសិទ្ធភាព។
ព្រះមហាក្សត្រ បានមានព្រះរាជបន្ទូលបន្តថា ក្នុងរយៈពេល៤អាណត្តិកន្លងមក រដ្ឋសភា បានអនុម័តច្បាប់ និងសន្ធិសញ្ញានានា ចំនួនជាង ៤០០សំខាន់ គឺច្បាប់ស្តីពីការបង្កើត និងពង្រឹង ស្ថាប័នរដ្ឋបាល នយោបាយ ហិរញ្ញវត្ថុ សេដ្ឋកិច្ច សង្គម និងបរិស្ថាន។ល។
“ខ្ញុំសង្ឃឹមថានៅអាណត្តិទី៥នេះ រដ្ឋសភានិងអនុម័តច្បាប់ ដែលបម្រើដល់វិស័យពង្រឹងយុត្តិធម៌ គឺច្បាប់ស្តីពី ការចាត់តំាងអង្គការតុលាការ និងអយ្យការ និងច្បាប់ស្តីពី លក្ខន្តិកៈ របស់ ចៅក្រម និងព្រះរាជអាជ្ញា “ នេះជាព្រះរាជសាររបស់ព្រះមហាក្សត្រ។
ព្រះអង្គបានមានព្រះរាជបន្ទូលបន្តថា ការខិតខំប្រឹងប្រែងរបស់សម្តេច ឯកឧត្តម និង លោកជំទាវ សមាជិក សមាជិកាដ៏ឧត្តុង្គឧត្តម នៃរដ្ឋសភាគ្រប់រូប គឺជាសកម្មភាពបម្រើជាតិមាតុភូមិដ៏ឧត្តុង្គឧត្តម ដែលញ៉ាំងឲ្យប្រទេសជាតិរក្សាបាននូវសន្តិភាព ស្ថិរភាព និងការអភិវឌ្ឈ ដែលប្រជាពលរដ្ឋកម្ពុជាគ្រប់រូប ប្រាថ្នាចង់បាន និងត្រូវការជាចំាបាច់ ដើម្បីរស់នៅដោយសុខសាន្ត។
សូមជម្រាបជូនថា នៅក្នុងសម័យប្រជុំរដ្ឋសភា លើកទី២ នីតិកាលទី៥ ថ្ងៃទី១ ខែមេសា ឆ្នាំ២០១៤ មានរបៀបវារៈចំនួន៦ រួមមាន ទី១ ព្រះរាជសារ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជូនសម័យប្រជុំ រដ្ឋសភា លើកទី២ នីតិកាលទី៥។ ទី២ របាយការណ៍ស្តីពីសកម្មភាព របស់រដ្ឋសភា ចន្លោះសម័យប្រជុំ រដ្ឋសភាលើកទី១ និងលើកទី២ នីតិកាលទី៥។ ទី៣ ការបោះឆ្នោតជ្រើសតំាង ឯកឧត្តម សារី កោលស្យ ជាសមាជិកគណៈកម្មការ សាធារណការដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់។ ទី៤ ការពិភាក្សា និងអនុម័តសេចក្តី ព្រាងច្បាប់ ស្តីពីការទូទាត់ថវិកាទូទៅរបស់រដ្ឋ សម្រាប់ការគ្រប់គ្រង ឆ្នាំ២០១២។ ទី៥ ការពិនិត្យ និងអនុម័តសេចក្តីព្រាងច្បាប់ ស្តីពីផ្លូវ ថ្នល់។ ទី៦ ការពិភាក្សា និងអនុម័តសេចក្តីព្រាងច្បាប់ ស្តីពីការអនុម័តយល់ព្រម លើពិធីសារ ស្តីពីវិសោធនកម្មលើកិច្ចព្រមព្រៀងរវាង រាជរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាល នៃសាធារណរដ្ឋសង្គមនិយមវៀតណាម ស្តីពីការជំរុញ និងការការពារវិនិយោគ។
សម័យប្រជុំរដ្ឋសភាលើកទី២ នីតិកាលទី៥ ថ្ងៃទី១ ខែមេសា ឆ្នាំ២០១៤ ក្រោមអធិបតីភាព ដ៏ខ្ពង់ខ្ពស់របស់ សម្តេចអគ្គមហាពញា ចក្រី ហេង សំរិន ប្រធានរដ្ឋសភា ឯកឧត្តមបណ្ឌិត ងួន ញ៉ិល អនុប្រធានទី២ និងលោកជំទាវ ឃួន សុដារី អនុប្រធានទី២ រដ្ឋសភា។ សមាជិកសមាជិការដ្ឋសភាចូលរួមអង្គប្រជុំមានចំនួន៦៤រូប៕