នៅរសៀលថ្ងៃទី៣០ ខែកញ្ញា ឆ្នាំ២០១៦ សមាជិកគណៈប្រតិភូសភាកម្ពុជា ដែលចូលរួមមហាសន្និបាតលើកទី៣៧ អន្តរសភាអាស៊ាន(AIPA) នៅទីក្រុង ណៃពិដោ ប្រទេសមីយ៉ាន់ម៉ា ដែលមាន លោកជំទាវ និន សាផុន លោកជំទាវ គ្រួច សំអាន សមាជិការដ្ឋសភា និង ឯកឧត្តម ខៀវ មុត សមាជិក ព្រឹទ្ធសភា បានអញ្ជើញចូលរួមកិច្ចប្រជុំគណៈកម្មាធិការស្រ្តីអាយប៉ា ជាមួយសមាជិកគណៈប្រតិភូអន្តរសភាអាស៊ានទំាង១០ប្រទេស។
គណៈកម្មាធិការស្រ្តីអាយប៉ា បានប្រជុំពិនិត្យលើសេចក្តីព្រាងសេចក្តីសម្រេចចំនួនបី ដែលមានសេចក្តីព្រាងសេចក្តីសម្រេច ស្តីពីការធ្វើវិសោធនកម្ម លើនីតិវិធីច្បាប់នៃស្រ្តីសមាជិកអាយប៉ូទៅជាស្រ្តីសមាជិកអាយប៉ា សេចក្តីព្រាងសេចក្តីសម្រេច ស្តីពីការងារសមរម្យសម្រាប់ស្រ្តីនៅក្នុងតំបន់អាស៊ាន ជំរុញការគំាពារសង្គមនិងឱកាសសមភាព និងសេចក្តីព្រាងសេចក្តីសម្រេច ស្តីពីបន្តផលប្រយោជន៍ស្រ្តីមានផ្ទៃពោះ ចំពោះការងារស្រ្តីក្នុងតំបន់ អាស៊ាន។
ប្រធានបទទំាងនេះ ជាគតិយុត្តដែលបម្រើដល់ផលប្រយោជន៍ពលរដ្ឋអាស៊ាន ពិសេសស្រ្តីភេទ។ កិច្ចប្រជុំគណៈកម្មាធិការស្រ្តីអាយប៉ា បានប្រជុំពិនិត្យ និងបានផ្លាស់ប្តូរយោបល់ ទស្សនៈគ្នាទៅវិញទៅមកយ៉ាងផុសផុលនៅលើសេចក្តីព្រាងសេចក្តីសម្រេចទំាងបីនេះ៕
អត្ថបទនិងរូបភាព ដោយនាយកដ្ឋានព័ត៌មាន