“មានអ្នកវិនិយោគទុនរបស់ប្រទេសម៉ាឡេស៊ីជាច្រើន បានចាប់អារម្មណ៍មកបណ្តាក់ទុននៅកម្ពុជាហើយកម្ពុជាបានស្វាគមន៍ និងយកចិត្តទុកដាក់ចំពោះ អ្នកវិនិយោគទុនម៉ាឡេស៊ី”។ ទំាងនេះជាកក្តាសំខាន់ដែល ឯកឧត្តម ដាតុ ស្រ៊ី ហាសាន ម៉ាឡេក (Dato’ Sri Hasan Malek) ឯកអគ្គរាជទូតប្រទេស ម៉ាឡេស៊ីដែលទើបតែងតាំងថ្មីប្រចំានៅព្រះរាជាណាចក្រកម្ពុជា មានជំនឿថាទំហំពាណិជ្ជកម្មកម្ពុជា និងម៉ាឡេស៊ីនឹងកើនឡើង នៅពេលខាងមុខនេះ ។ជាមួយការកើនឡើងខាងវិនិយោគ ចំណងមិត្តភាព កិច្ចសហប្រតិបត្តិរវាងប្រទេសទំាងពីរក៏កាន់តែរឹងមាំ។
ឯកឧត្តមឯកអគ្គរាជទូត បានសម្តែងសុទិដ្ឋិនិយមបែបនេះ ជម្រាបជូនសម្តេចប្រធានរដ្ឋសភា នៃព្រះរាជាណាចក្រកម្ពុជា ក្នុងឱកាសដែលឯកឧត្តមត្រូវ បាន សម្តេចអគ្គមហាពញាចក្រី ហេង សំរិន ប្រធានរដ្ឋសភា អនុញ្ញាតឲ្យចូលជួបសម្តែងការគួរសម នាព្រឹកថ្ងៃទី១៨ ខែសីហា ឆ្នាំ២០១៦នេះនៅវិមាន រដ្ឋសភា។
ឯកឧត្តមឯកអគ្គរាជទូតម៉ាឡេស៊ីបានលើកឡើងថា អ្នកវិនិយោគទុនប្រទេសម៉ាឡេស៊ី បានចាប់អារម្មណ៍ក្នុងការមកបណ្តាក់ទុននៅកម្ពុជា គឺបន្ទាប់ពី ប្រទេសទំាងពីរបានធ្វើការផ្លាស់ប្តូរដំណើរទស្សនកិច្ចថ្នាក់ដឹកនាំកំពូល រវាងគ្នាទៅវិញទៅមកនាពេលកន្លងមកនេះពោលគឺ សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញទៅបំពេញទស្សនកិច្ច និងចូលរួមវេទិកាសេដ្ឋកិច្ចនៅប្រទេសម៉ាឡេស៊ី កាលពីពេល ថ្មីៗនេះ ខណៈដែល ឯកឧត្តម NAJIB RAZAK នាយរដ្ឋមន្រ្តីប្រទេសម៉ាឡេស៊ី បានមកបំពេញទស្សនកិច្ចនៅកម្ពុជាកាលពីឆ្នាំ២០១២។
សូមបញ្ជាក់ថាទំហំពាណិជ្ជកម្មរវាងកម្ពុជានិងម៉ាឡេស៊ីនាពេលបច្ចុប្បន្នមានប្រមាណជិត២ពាន់លានដុល្លារ។ ឯកឧត្តម ដាតុ ស្រ៊ី ហាសាន ម៉ាឡេក បានជម្រាបជូនសម្តេចប្រធានរដ្ឋសភាថា នៅក្នុងអាណត្តិបេសកកម្មការទូត របស់ឯកឧត្តមនៅកម្ពុជានេះ ឯកឧត្តមនឹងខិតខំពង្រឹងពង្រីកទំនាក់ទំនង និងកិច្ចសហប្រតិបត្តិការរវាងប្រទេសកម្ពុជានិងម៉ាឡេស៊ីឱ្យមានការរីកចម្រើនឡើង ពិសេសខាងវិស័យពាណិជ្ជកម្មនេះ។ ជាមួយគ្នានេះឯកឧត្តមក៏បាន សន្យាថានឹងធ្វើឲ្យរឹងមាំនូវទំនាក់ទំនង និងកិច្ចសហប្រតិបត្តិការល្អ រវាងស្ថាប័ននីតិប្បញ្ញត្តិកម្ពុជានិងម៉ាឡេស៊ីផងដែរ។
ដើម្បីពង្រឹងពង្រីកចំណងមិត្តភាព និងកិច្ចសហប្រតិបត្តិការរវាងរដ្ឋសភាកម្ពុជា និងរដ្ឋសភាម៉ាឡេស៊ីនេះ ឯកឧត្តម ដាតុ ស្រ៊ី ហាសាន ម៉ាឡេក បាន គោរពអញ្ជើញសម្តេចប្រធានរដ្ឋសភា ដឹកនាំគណៈប្រតិភូរដ្ឋសភាកម្ពុជា ទៅបំពេញទស្សនកិច្ចផ្លូវការ និងមិត្តភាពនៅពេលវេលាសមស្របណាមួយ ពិសេសឯកឧត្តមបានសំណូមពរដល់សម្តេច សូមអញ្ជើញទស្សនកិច្ចនៅម៉ាឡេស៊ី ឲ្យចំពេលដែលរដ្ឋសភាម៉ាឡេស៊ីមានកិច្ចប្រជុំពេញអង្គ ដើម្បីអាចជា ដើម្បីអាចជាឱកាសល្អ ក្នុងការផ្លាស់ប្តូរបទពិសោធន៍គ្នាទៅវិញទៅមក។
ឯកឧត្តមឯកអគ្គរាជទូតបានគូសបញ្ជាក់ថា រដ្ឋសភាប្រទេសកម្ពុជានិងប្រទេសម៉ាឡេស៊ី មានស្ថានភាពមិនខុសគ្នានោះទេ គឺសមាជិករដ្ឋសភាមានមកពី គណបក្សកាន់អំណាច និងគណបក្សប្រឆំាង។ រដ្ឋសភាជាវេទិកាដែលគណបក្សនយោបាយបញ្ចេញមតិដាក់គ្នាយ៉ាងតឹងតែងបំផុត។
ក្នុងនាមរដ្ឋសភា សម្តេចអគ្គមហាពញាចក្រី ហេង សំរិន បានវាយតំលៃខ្ពស់ចំពោះវឌ្ឍនភាពនៃទំនាក់ទំនងការទូត និងកិច្ចសហប្រតិបត្តិការរវាងប្រទេសកម្ពុជានិងម៉ាឡេស៊ី ដែលបានបន្តចាក់គ្រឹះដ៏រឹងមាំរហូតសព្វថ្ងៃនេះ។ សម្តេចបានលើកឡើងថា ឯកអគ្គរាជទូតម៉ាឡេស៊ី មុនៗ បានបន្សល់ទុក នូវស្នាដៃជាច្រើនក្នុងការជំរុញលើកកម្ពស់ទំនាក់ទំនង ចំណងមិត្តភាព និងកិច្ចសហប្រតិបត្តិការ រវាងប្រជាជាតិទាំងពីរលើគ្រប់វិស័យ។ សម្តេចមាន ក្តីសង្ឃឹមថា ក្នុងអាណត្តិការទូតថ្មីនេះ ឯកឧត្តម នឹងបន្តពង្រីកនូវមរតក នៃកិច្ចសហប្រតិបត្តិការដ៏ប្រពៃនេះ បន្ថែមទៀត។
សម្តេចបានគំាទ្រការលើកឡើងរបស់ឯកឧត្តមឯកអគ្គរាជទូត និងទទួលយកការគោរពអញ្ជើញ ដោយសម្តេចនឹងរកពេលវេលាសមស្របណាមួយដើម្បី បំពេញទស្សនកិច្ចនៅម៉ាឡេស៊ី។
ជាទីបញ្ចប់សម្តេចបានសំណូមពរដល់ប្រទេសម៉ាឡេស៊ី ជួយបង្កើនចំនួនអាហារូបករណ៍ដល់និស្សិតកម្ពុជា បានទៅសិក្សានៅប្រទេសម៉ាឡេស៊ីដែលជា ធនធានយ៉ាងសំខាន់ក្នុងការចូលរួមអភិវឌ្ឍន៍ប្រទេសកម្ពុជា និងសូមឲ្យម៉ាឡេស៊ី បង្កើនការនាំចូលផលិតផលកសិកម្ម ពីកម្ពុជាឲ្យបានច្រើនថែមទៀត៕
អត្ថបទនិងរូបភាព នាយកដ្ឋានព័ត៌មាន