ដើម្បីជំរុញប្រសិទ្ធិភាពការងារលើកិច្ចការព័ត៌មាននិងICT បម្រើដល់មហាសន្និបាតសភាតំបន់អាស៊ីលើកទី៩ ឲ្យបានល្អ និងជោគជ័យ ឯកឧត្តម ឈាង វុន ប្រធានគណៈកម្មការកិច្ចការបរទេស សហប្រតិបត្តិការ អន្តរជាតិ ឃោសនាការ និងព័ត៌មាន នៃរដ្ឋសភា និង ជាប្រធានអនុគណៈកម្មការ ព័ត៌មាននិងICT នៃគណៈកម្មការរៀបចំមហាសន្និបាតលើកទី៩ នៃសភាតំបន់អាស៊ី (APA) បានដឹកនាំកិច្ចប្រជុំ ក្រុមការងារ ដើម្បីដាក់ផែនការ និងការអនុវត្តការងារផ្ទាល់ សម្រាប់បម្រើមហាសន្និបាតលើកទី៩ នាពេលខាងមុខ។
សភានៃព្រះរាជាណាចក្រកម្ពុជា គ្រោងធ្វើជាម្ចាស់ផ្ទះរៀបចំមហាសន្និបាតសភាតំបន់អាស៊ី(APA)លើកទី៩ នៅថ្ងៃទី២៧ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០១៦ខាងមុខ នៅលើទឹកដីអង្គរ ខេត្តសៀមរាប។ ដើម្បីត្រៀមរៀបចំមហាសន្និបាតនេះ គណៈកម្មការរៀបចំមហាសន្និបាត នៃសភាកម្ពុជា បានសម្រេចបង្កើតអនុគណៈកម្មការចំនួន៦ ទទួលបន្ទុកវិស័យការងារផ្សេងៗគ្នា ក្នុងនោះ មានអនុគណៈកម្មការព័ត៌មាន និងICT មួយដែរ។
នៅក្នុងកិច្ចប្រជុំត្រួតពិនិត្យ និងដាក់ផែនការការងារខាងផ្នែកព័ត៌មាន និង ICTនេះ ឯកឧត្តម ឈាង វុន បានស្នើដល់ថ្នាក់ដឹកនាំតាមផ្នែកនីមួយៗ និងមន្រ្តីរាជការទំាងអស់ត្រូវយកចិត្តទុកដាក់ក្នុងការបំពេញភារកិច្ច ជូនស្ថាប័នឲ្យទទួលជោគជ័យ។ ឯកឧត្តមបានជំរុញឲ្យមន្រ្តីទទួលបន្ទុកត្រូវ កំណត់ភារកិច្ច និងចំនួនមន្រ្តីឲ្យបានច្បាស់លាស់។
ជាមួយគ្នានេះ ឯកឧត្តមប្រធាន អង្គប្រជុំក៏បានស្នើដល់ក្រុមការងារត្រូវយកចិត្តទុកដាក់លើការផ្សព្វផ្សាយពីព្រឹត្តិការណ៍មហាសន្និបាតនេះ ជូនដល់ ប្រជាពលរដ្ឋបានដឹងតាមរយៈ ការផលិតឯកសារវីដេអូសម្រាប់ផ្សព្វផ្សាយ និងពិនិត្យលទ្ធភាពផ្សាយផ្ទាល់ពីព្រឹត្តិការណ៍នេះ តាមរយៈទំព័រ Facebook។
សូមជម្រាបថាកាលពីចុងឆ្នាំ២០១៥ សភាកម្ពុជាបានទទួលធ្វើជាម្ចាស់ផ្ទះមហាសន្និបាតលើកទី៨ នៃសភាតំបន់អាស៊ី (APA) ម្តងរួចមកហើយ ប៉ុន្តែសភាតំបន់អាស៊ី បានតម្រូវឲ្យប្រទេសទទួលធ្វើជាម្ចាស់ផ្ទះ នៃមហាសន្និបាតគឺទទួលរៀបចំពីរឆ្នាំជាប់គ្នា ដូច្នេះសភាកម្ពុជាទទួលរៀបចំ មហាសន្និបាតសភាតំបន់អាស៊ី លើកទី៨ និងលើកទី៩។
តាមរយៈការទទួលរៀបចំ មហាសន្និបាតសភាតំបន់អាស៊ី ទំាងពីរលើកនេះបានបង្ហាញពីការចូលរួមយ៉ាងសកម្ម របស់សភាកម្ពុជា ក្នុងការចូលរួម ចំណែកថែរក្សាសុខសន្តិភាព ជូនដល់ប្រជាពលរដ្ឋនៅក្នុងតំបន់ និងពិភពលោក ក្នុងក្របខណ្ឌស្ថាប័ននីតិប្បញ្ញត្តិនេះ៕
អត្ថបទនិងរូបភាព ដោយនាយកដ្ឋានព័ត៌មាន