គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃ រដ្ឋសភា ដឹកនាំដោយ ឯកឧត្តម ប៉ុល ហំម និងគណៈកម្មការ កិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន ដឹកនាំដោយ ឯកឧត្តម ឈាង វុន បានជួបពិភាក្សាដើម្បី ពិនិត្យសិក្សា សេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀង រវាងរាជរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាលហុងគ្រី ស្តីពីការ ជំរុញនិងការការពារទៅវិញទៅមកនៃវិនិយោគ នារសៀលថ្ងៃទី១១ ខែឧសភា ឆ្នាំ២០១៦ នៅវិមានរដ្ឋសភា។
ឯកឧត្តម ប៉ុល ហំម បានមានប្រសាសន៍ថា កិច្ចព្រមព្រៀងនេះត្រូវបានរដ្ឋាភិបាលប្រទេសទំាងពីរ ចុះហត្ថលេខានៅរាជធានីភ្នំពេញ កាលពីថ្ងៃទី១៤ ខែមករា ឆ្នាំ២០១៦ ដោយ ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា តំណាងរដ្ឋាភិបាលនៃព្រះរាជាណាចក្រកម្ពុជា និងឯកឧត្តម ភីធឺ ស៊ីចាតូ (Peter Szijiarto) រដ្ឋមន្ត្រីក្រសួងការបរទេស និងពាណិជ្ជកម្ម ប្រទេសហុងគ្រី តំណាងរដ្ឋាភិបាលហុងគ្រី។
ឯកឧត្តមប្រធានគណៈកម្មការ បានគូសបញ្ជាក់ថា កិច្ចព្រមព្រៀងនេះ មាន ១៤មាត្រាដែលបានបញ្ជាក់នូវចំណុចសំខាន់ៗ ទាក់ទងនឹង ការធានារបស់ភាគីម្ខាងៗចំពោះការវិនិយោគលើទឹកដីរបស់ខ្លួននូវការផ្តល់ប្រព្រឹត្តិកម្មដោយស្មើភាពគ្នាចំពោះការវិនិយោគនៃភាគីទំាងសង្ខាង និងគ្មាន ការរើសអើង ការមិនធ្វើជាតូបនីយកម្ម ឬអស្សាមិកករណ៍នូវទ្រព្យសម្បត្តិរបស់អ្នកវិនិយោគ ការផ្តល់ការអនុគ្រោះស្មើភាព លើកលែងតែជា ប្រព្រឹត្តិកម្មដែលភាគីជាម្ចាស់ផ្ទះមានដោយឡែកទាក់ទងទៅនឹងកិច្ចព្រមព្រៀងសហព័ន្ធគយ តំបន់សេដ្ឋកិច្ចសេរី កិច្ចព្រមព្រៀងសហព័ន្ធហិរញ្ញវត្ថុ ឬកិច្ចព្រមព្រៀងអន្តរជាតិទាក់ទងដល់កិច្ចការសារពើពន្ធ។
គណៈកម្មការជំនាញរដ្ឋសភាទំាងពីរខាងលើ បានពិភាក្សាយ៉ាងល្អិតល្អន់លើសេចក្តីព្រាងច្បាប់ តាមនីតិវិធី និងបានសម្រេចអញ្ជើញតំណាង រាជរដ្ឋាភិបាល មកឆ្លើយបំភ្លឺលើចំនុចមួយចំនួន មុនសម្រេចបញ្ជូនសេចក្តីព្រាងច្បាប់នេះ ទៅគណៈកម្មាធិការអចិន្រ្តៃយ៍រដ្ឋសភា ពិនិត្យ សម្រេច បញ្ចូលក្នុងរបៀបវារៈសម័យប្រជុំពេញអង្គ នាពេលខាងមុខ។
សូមជម្រាបថា តាមសេចក្តីថ្លែងហេតុរបស់រាជរដ្ឋាភិបាល ដែលផ្ញើជូនរដ្ឋសភា បានបញ្ជាក់ថា កិច្ចព្រមព្រៀងនេះ កម្ពុជាពិតជានឹងបោះជំហានថ្មី មួយទៀត ក្នុងការទាក់ទាញវិនិយោគពីប្រទេសជាមិត្ត តាមរយៈការបង្កើតជំនឿទុកចិត្តពីសំណាក់វិនិយោគហុងគ្រី៕
អត្ថបទនិងរូបថតដោយនាយកដ្ឋានព័ត៌មាន