ប្រជាពលរដ្ឋមកពីស្រុកមេមត់ ខេត្តត្បូងឃ្មុំ ប្រមាណជា១០០នាក់ តំណាងឲ្យប្រជាពលរដ្ឋជាង៣០០គ្រួសារ បានធ្វើដំណើរមកកាន់វិមានរដ្ឋសភា​នា ព្រឹកថ្ងៃទី២៧ ខែមេសា ឆ្នាំ២០១៦ នេះ ដើម្បីស្វែងរកកិច្ចអន្តរាគមន៍ពីរដ្ឋសភា ពិសេសពី សម្តេចអគ្គមហាពញាចក្រី ហេង សំរិន ប្រធានរដ្ឋសភា ជួយដោះស្រាយបញ្ហាដីធ្លីដល់ពួកគាត់។

នៅមុខវិមានដ្ឋសភា តំណាងពលរដ្ឋបានលើកឡើងថា ពួកគាត់បានមានជម្លោះដីធ្លី ជាមួយក្រុមហ៊ុនឯកជនមួយ ឈ្មោះ ម៉ែន សារុន តំាងពីឆ្នាំ ២០១៤មក។ ឆ្នាំ២០១៤ ដែលក្រុមហ៊ុនខាងលើ បានចូលទៅកាយហ៊ុំព័ទ្ធដី ស្ថិតនៅតំបន់ភូមិស្ទឹងស្រីចាស់ តំបន់ទួលស្រឡៅ តំបន់ច្រក របង តំបន់ ពុលប្រម៉ា តំបន់ទួលគ្រួស និងតំបន់ទួលប៉ូង ក្នុងឃុំជំាក្រវៀន និងទន្លូង ស្រុកមេមត់ ខេត្តត្បូងឃ្មុំ ដែលធ្វើឲ្យការប៉ះពាល់ដល់ការរស់នៅ និងការ បង្កបង្កើនផលចិញ្ចឹមជីវិត របស់ពួកគាត់។

នៅក្នុងលិខិតរបស់ប្រជាពលរដ្ឋ បានសូមសម្តេចប្រធានរដ្ឋសភាជួយអន្តរាគមន៍ ជំរុញដល់   ស្ថាប័នជំនាញចេញប្លង់កម្មសិទ្ធិដី ដល់ពួកគាត់ដើម្បី បញ្ចប់ជម្លោះនេះ និងបញ្ឈប់សកម្មភាពរំលោភនានា។  ប្រជាពលរដ្ឋលើកឡើងថា ដីដែលកំពុងមានជម្លោះនេះ មានទំហំជិត២ពាន់ហិកតា ហើយមាន ភាពមិនច្បាស់លាស់ពីព្រោះ មានភាគីច្រើនទាក់ទង គឺមានខាងភាគីពលរដ្ឋ ក្រុមហ៊ុន និងទាហាន។

តំណាងប្រជាពលរដ្ឋត្រូវបានអនុញ្ញាត ឲ្យយកពាក្យបណ្តឹងដាក់ជូនគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា នៃរដ្ឋសភា ភ្លាមៗបន្ទាប់ពីពួកគាត់ បានអញ្ជើញមកដល់មុខវិមានរដ្ឋសភា​៕