នៅក្នុងជំនួបសម្តែងការគួរសមជាមួយ សម្តេចអគ្គមហាពញាចក្រី ហេង សំរិន ប្រធានរដ្ឋសភា នាព្រឹកថ្ងៃទី១២ ខែកមុ្ភៈ ឆ្នាំ២០១៦ ក្នុងឱកាសដែល ឯកឧត្តមទើបទទួលតួនាទីជា ឯកអគ្គរដ្ឋទូតថ្មី សហភាពអឺរ៉ុប ប្រចំានៅកម្ពុជា ឯកឧត្តម ចច អ៊ីហ្គា (George Edgar) បានលើកឡើងថា សហភាពអឺរ៉ុប នៅតែយកចិត្តទុកដាក់ជាខ្លំាងជាមួយនឹងកម្ពុជា នៅក្នុងនោះពីឆ្នាំ២០១៤ ដល់ឆ្នាំ២០២០ គម្រោងរបស់សហភាពអឺរ៉ុបជួយមកកម្ពុជា មានលើវិស័យអប់រំ កំណែទម្រង់វិមជ្ឈការ វិសហមជ្ឈការ និងវិស័យកសិកម្ម សុខាភិបាល ជាដើម។
ឯកឧត្តម ចច អ៊ីហ្គា បានជម្រាបជូនសម្តេចប្រធានរដ្ឋសភាថា ដើម្បីសម្រេចកិច្ចការដ៏សំខាន់ខាងលើនោះ ឯកឧត្តមនឹងខិតខំបំពេញការងារនៅក្នុង អាណត្តិការទូត រយៈពេល៤ឆ្នាំទៅមុខនេះ។ “ខ្ញុំរីករាយដែលបានឃើញចំណងមិត្តភាពកម្ពុជា និងសហភាពអឺរ៉ុប មានការរីកចម្រើនជាលំដាប់។ ខ្ញុំនឹងខិតខំជំរុញទំនាក់ទំនងការទូត កិច្ចសហប្រតិបត្តិការ រវាងកម្ពុជា និងសហភាពអឺរ៉ុប ក្នុងនោះមានទំនាក់ទំនង ខាងរដ្ឋសភាផងដែរ”។
ឯកឧត្តម ឯកអគ្គរដ្ឋទូត សហភាពអឺរ៉ុប បានជម្រាបជូនសម្តេចប្រធានរដ្ឋសភា បន្តទៀតថា ពិតណាស់ថា នៅពេលនេះរដ្ឋសភាកម្ពុជាមានទំនាក់ទំនង គ្នាយ៉ាងល្អ ជាមួយរដ្ឋសភាបណ្តាប្រទេសមួយចំនួន ដែលជាសមាជិកសហភាពអឺរ៉ុប ប៉ុន្តែកិច្ចការនេះត្រូវការពង្រឹងពង្រីកបន្ថែមទៀត។ ក្នុងន័យនេះ ឯកឧត្តម ចច អ៊ីហ្គា បានសន្យាថានឹងខិតខំជួយជំរុញទំនាក់ទំនាក់រដ្ឋសភាកម្ពុជា និងរដ្ឋសភាបណ្តាប្រទេសសមាជិកសហភាពអឺរ៉ុបផងដែរ។
ជាការឆ្លើយតប សម្តេចអគ្គមហាពញាចក្រី ហេង សំរិន បានមានប្រសាសន៍ថា ក្នុងនាមរដ្ឋសភា និងក្នុងនាមសម្តេចផ្ទាល់ សម្តេចសូមអបអរសាទរ ឯកឧត្តម ចច អ៊ីហ្គាដែលត្រូវបានទទួលការតែងតាំងជាឯកអគ្គរដ្ឋទូតសហភាពអឺរ៉ុប ប្រចាំនៅព្រះរាជាណាចក្រកម្ពុជា ។
សម្តេចបានលើកឡើងដែលថា ក្នុងរយៈពេលជាង២០ឆ្នាំមកនេះ ទំនាក់ទំនងរវាងកម្ពុជា-សហភាពអឺរ៉ុប បានបោះជំហ៊ានទៅមុខគួរឲ្យកត់សំគាល់ ក្នុងការពង្រឹងពង្រីកទំនាក់ទំនង និងកិច្ចសហប្រតិបត្តិការ រវាងកម្ពុជា និងបណ្តាប្រទេសក្នុងសហភាពអឺរ៉ុប។
“រដ្ឋសភាកម្ពុជា សូមអរគុណសហភាពអឺរ៉ុប ដែលបានគាំទ្រការអភិវឌ្ឍន៍ប្រទេសកម្ពុជាលើវិស័យជាច្រើន ដូចជាការលើកកម្ពស់លទ្ធិប្រជាធិបតេយ្យ សិទ្ធមនុស្ស អប់រំ សុខាភិបាល កសិកម្ម និងវិស័យអភិបាលកិច្ច និងការគ្រប់គ្រងនិងជាពិសេស នយោបាយអនុគ្រោះពន្ធដល់កម្ពុជា ដែលធ្វើឲ្យមានកំណើនពាណិជ្ជកម្ម នាំចេញពីកម្ពុជាជាបន្តបន្ទាប់” នេះជាប្រសាសន៍លើកឡើងរបស់សម្តេចប្រធានរដ្ឋសភា។
សូមបញ្ជាក់ថាសហភាពអឺរ៉ុប ជាទីផ្សារនាំចេញដ៏ធំរបស់កម្ពុជា ពិសេសផលិតផលកសិកម្ម។ នៅក្នុងឱកាសជួបសម្តែងការគួរសមជាមួយ សម្តេច ប្រធានរដ្ឋសភា នេះ ឯកឧត្តម ឯកអគ្គរដ្ឋទូត សហភាពអឺរ៉ុប ក៏បានលើកឡើងពីការខិតខំក្នុងការជំរុញកំណើនទំហំពាណិជ្ជកម្មកម្ពុជា និងសហភាពអឺរ៉ុប ផងដែរ។
ជាទីបញ្ចប់ សម្តេចបានសម្តែងក្តីសង្ឃឹមថា ក្នុងអាណត្តិការទូត របស់ ឯកឧត្តម ចច អ៊ីហ្គា នឹងធ្វើឲ្យទំនាក់ទំនងដ៏ល្អរវាង កម្ពុជា និងសហភាពអឺរ៉ុប ត្រូវបានបន្តថែរក្សា ព្រមទាំងអភិវឌ្ឍជាបន្តបន្ទាប់៕
អត្ថបទនិងរូបភាព ដោយនាយកដ្ឋានព័ត៌មាន