សភាឌូម៉ា សហព័ន្ធរុស្ស៊ី និងសាធារណរដ្ឋកូរ៉េ គ្រោងរៀបចំមហាសន្និបាតប្រធានសភាតំបន់អឺរ៉ុប-អាស៊ី នៅក្នុងប្រទេសរុស្ស៊ី នាខែមេសា ឆ្នាំ២០១៦ ខាងមុខនេះ និងបានអញ្ជើញ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា ចូលរួមមហាសន្និបាតនោះដែរ។
ឯកឧត្តម ឡេង ប៉េង ឡុង អគ្គលេខាធិការរដ្ឋសភា បានអនុញ្ញាតឲ្យ លោក ValeryKHODZHAEV ទីប្រឹក្សា ឯកឧត្តម ឯកអគ្គរដ្ឋទូត ប្រទេសរុស្ស៊ី ប្រចំានៅកម្ពុជា ជួបពិភាក្សាអំពីបញ្ហានេះនៅរសៀលថ្ងៃទី១១ ខែកុម្ភៈ ឆ្នាំ២០១៦នេះ នៅវិមានរដ្ឋសភា។
នៅក្នុងជំនួបពិភាក្សានេះ លោក Valery KHODZHAEV បានជម្រាបជូន ឯកឧត្តមអគ្គលេខាធិការរដ្ឋសភា អំពីប្រធានបទសំខាន់ៗ នៅក្នុង មហាសន្និបាត ដែលគ្រោងធ្វើនោះ គឺដើម្បីពង្រឹងចំណងមិត្តភាពសភាតំបន់អឺរ៉ុប និងអាស៊ី ក្នុងការកសាងសុខសន្តិភាព និងរួមគ្នាប្រយុទ្ធប្រ ឆំាងអំពើភេវកម្ម។
លោក Valery KHODZHAEV បានស្នើសូម ឯកឧត្តម ឡេង ប៉េងឡុង មេត្តាពិនិត្យកម្មវិធីការងាររបស់សម្តេចប្រធានរដ្ឋសភា ដើម្បីធ្វើយ៉ាងណា គោរពអញ្ជើញសម្តេច បានចូលរួមមហាសន្និបាត មានសារៈសំខាន់នេះ។
ជាឆ្លើយតប ឯកឧត្តមអគ្គលេខាធិការ បានសន្យាថា នឹងលើកយកបញ្ហានេះជម្រាបជូនសម្តេច អគ្គមហាពញាចក្រី ហេង សំរិន ដើម្បីសម្តេចសម្រេច។ ជាមួយគ្នានេះ ឯកឧត្តម ឡេង ប៉េងឡុង បានសម្តែងការពេញចិត្ត និងគំាទ្រ ប្រធានបទមហាសន្និបាតក្នុងទិសដៅ ដើម្បីការរួបរួមគ្នាលើកកម្ពស់ សន្តិភាពនេះ។
ឯកឧត្តម គូសបញ្ជាក់ថា ពិភពលោកនេះគួរ មានសុខសន្តិភាព ដើម្បីឲ្យមនុស្សបានរស់នៅជាមួយគា្ន ដោយសុខដុមរមនា។ “ខ្ញុំគំាទ្រសកម្មភាព ទំាងឡាយណា ដែលធ្វើឲ្យមនុស្សរួបរួមគ្នា ជឿជាក់និងស្រឡាញ់សន្តិភាព។ មានតែសន្តិភាពទេ ទើបធ្វើឲ្យមនុស្សយើង រស់នៅ មានសុភមង្គល។ យើងជាមនុស្ស ជាបងប្អូននឹងគ្នា យើងគួរតែស្រឡាញ់គ្នា មិនធ្វើសង្រ្គាម ហិង្សាដាក់គ្នា” ឯកឧត្តម ឡេង ប៉េងឡុង បញ្ជាក់បន្ថែម។
លោក Valery KHODZHAEV បានគំាទ្រចំពោះការលើកឡើងរបស់ ឯកឧត្តមអគ្គលេខាធិការរដ្ឋសភា និងបានស្នើសុំ ឯកឧត្តម ឡេង ប៉េងឡុង មេត្តាពិនិត្យលទ្ធភាពផងដែរ ដើម្បីផ្តល់ឱកាសជូន ឯកឧត្តម ឯកអគ្គរដ្ឋទូត ប្រទេសរុស្ស៊ី ប្រចំានៅកម្ពុជា បានចូលជួបពិភាក្សាការងារជាមួយ សម្តេច ហេង សំរិន ក្នុងការរឹតចំណងមិត្តភាពកាន់តែរឹងមាំរវាងប្រទេសទំាងពីរ កម្ពុជា-រុស្ស៊ី។ ជាមួយគ្នានេះ លោក Valery KHODZHAEV បានលើកឡើងថា គណៈប្រតិភូជាន់ខ្ពស់ សភាឌូម៉ាសហព័ន្ធរុស្ស៊ី ក៏គ្រោងនឹងមកទស្សនកិច្ចជាផ្លូវការ និងមិត្តភាព នៅកម្ពុជា នាខែមីនា ខាងមុខនេះដែរ៕
អត្ថបទនិងរូបថត ដោយនាយកដ្ឋានព័ត៌មាន
