គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា ដឹកនាំដោយ ឯកឧត្តមបណ្ឌិតរដ្ឋ ជាម យៀប ប្រធានគណៈកម្មការ បានប្រជុំផ្ទៃក្នុងគណៈកម្មការ ដើម្បីពិនិត្យសិក្សាលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៦ នៅព្រឹកថ្ងៃទី០៦ខែវិច្ឆិកាឆ្នាំ២០១៥នៅវិមានរដ្ឋសភា ។
ឯកឧត្តមបណ្ឌិតរដ្ឋ ជាម យៀប បានមានប្រសាសន៍ថា សេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៦ ជាសេចក្ដីព្រាងច្បាប់ដ៏មាន សារៈសំខាន់ ដែលតាក់តែងឡើង ស្របទៅតាមបំណងប្រាថ្នារបស់ប្រជាជនកម្ពុជា និងតម្រូវការនៃការអភិវឌ្ឍរីកចម្រើនរបស់ប្រទេសជាតិ ព្រមទាំងស្របទៅតាម គោលដៅជាយុទ្ធសាស្រ្ត ដូចមានចែងក្នុងយុទ្ធសាស្រ្ត ចតុកោណដំណាក់ទី៣ ដែលជារបៀបវារៈគោលនយោបាយ សង្គម-សេដ្ឋកិច្ច នៃកម្មវិធីនយោបាយរបស់រដ្ឋាភិបាលនីតិកាលទី៥ នៃរដ្ឋសភា។
ឯកឧត្តមបណ្ឌិតរដ្ឋ ជាម យៀប បានមានប្រសាសន៍បន្តថា ការពិនិត្យសិក្សាលើសេចក្តីព្រាងច្បាប់ថវិកាឆ្នាំ២០១៦នៅពេលនេះ គឺគ្រាន់តែពិនិត្យលើទម្រង់ច្បាប់ និងពាក្យពេចន៍អក្ខរាវិរុទ្ធមួយចំនួនដោយរក្សាទុកខ្លឹមសារនៅដដែល បន្ទាប់មកនឹងមានកិច្ចប្រជុំពិភាក្សា ជាមួយ ឯកឧត្តមបណ្ឌិត អូន ព័ន្ធមុនីរ័ត្ន រដ្ឋមន្រី្តក្រសួងសេដ្ឋកិច្ច និងហរិញ្ញវត្ថុ នៅថ្ងៃទី១១ ខែវិច្ឆិកា ឆ្នាំ២០១៥ ខាងមុខ ដើម្បីពិភាក្សាលើចំណុច ដែលជាចម្ងល់ផ្សេងៗ របស់គណៈកម្មការ មុននឹងបញ្ជូនត្រលប់ទៅគណៈកម្មាធិការអចិន្ត្រៃយ៍រដ្ឋសភា សម្រេចដាក់បញ្ចូលក្នុងរបៀបវារៈសម័យប្រជុំពេញអង្គរដ្ឋសភា។
អត្ថបទនិងរូបភាពពីនាយកដ្ឋានព័ត៌មាន
