កិច្ចប្រជុំប្រចាំឆ្នាំលើកទី២ របស់គណៈកម្មការមហាផ្ទៃ ការពារជាតិ សន្តិសុខ នៃរដ្ឋសភា ប្រទេសកម្ពុជា ឡាវ វៀតណាម ស្តីពីការលើកស្ទួយតួនាទី ភារកិច្ចសភាក្នុងការពិនិត្យតាមដាន និងគាំទ្រ ដល់សកម្មភាពអភិវឌ្ឍតំបន់ត្រីកោណអភិវឌ្ឍន៍(CLV)ដែលបានរៀបចំធ្វើនៅក្នុងខេត្តចំប៉ាសាក់ប្រទេសទ្បាវ បានបិទបញ្ចប់ នៅល្ងាចថ្ងៃចន្ទ ទី២៨ ខែកញ្ញា ឆ្នាំ២០១៥។
ជាលទ្ធផល តំណាងរដ្ឋសភា ទំាងបីប្រទេសបានព្រមព្រៀងគ្នា បង្កើនកិច្ចសហប្រតិបត្តិការ រវាងប្រទេសទំាងបី ដើម្បីជំរុញការអភិវឌ្ឍតំបន់ត្រីកោណ ឲ្យសម្រចបានតាមផែនការ របស់រដ្ឋាភិបាលប្រទេសកម្ពុជា ឡាវ និងវៀតណាម ដែលបានព្រមព្រៀងគ្នា។
នៅក្នុងពិធីប្រកាសបិទអង្គប្រជុំ គណៈប្រតិភូនៃគណៈកម្មការផែនការ ការពារជាតិ សន្តិសុខ នៃរដ្ឋសភាប្រទេសកម្ពុជា ឡាវ និងវៀតណាម បានចុះហត្ថលេខាលើកំណត់ហេតុនៃកិច្ចប្រជុំលើកទី២ ក្នុងន័យបន្តពង្រឹងពង្រីកទំនាក់ទំនង ដែលមានជាប្រពៃណី រវាងប្រទេសទាំងបី ព្រមទំាងបាន លើកទឹកចិត្តឲ្យមានកិច្ចសហការគ្រប់ភាគីពាក់ព័ន្ធ និងគ្រប់កម្រិត រវាងប្រទេសទំាងបី ជាពិសេសកិច្ចសហប្រតិបត្តិការ រវាងអាជ្ញាធរមូលដ្ឋាននៃខេត្តជាប់ព្រំប្រទល់គ្នាក្នុងតំបន់CLV ដើម្បីលើកកម្ពស់ការអភិវឌ្ឍនៅក្នុងតំបន់ត្រីកោណអភិវឌ្ឍន៍កម្ពុជា ឡាវ និងវៀតណាម(CLV)នេះ។
ឯកឧត្តម វិទ្បៃ ដួងម៉ានីប្រធានគណៈកម្មាធិការការពារប្រទេស និងសន្តិសុខរដ្ឋសភា ទ្បាវ និងជាប្រធានដឹកនាំកិច្ចប្រជុំបានសម្តែងនូវការអបអរសាទរ ចំពោះលទ្ធផលដែលសម្រេចបាន នៅក្នុងកិច្ចប្រជុំពេលនេះ។ ឯកឧត្តមបញ្ជាក់ថា លទ្ធផលនេះ បានបង្ហាញពីស្មារតី សាមគ្គីមិត្តភាព ជាបងប្អូននៃប្រទេសកម្ពុជា ឡាវ និងវៀតណាម ក៏ដូចជាប្រជាជាតិអាស៊ានទាំងមូល ។
សូមរម្លឹកថា គណៈប្រតិភូរដ្ឋសភាប្រទេសកម្ពុជាទៅចូលរួមកិច្ចប្រជុំនេះ ដឹកនាំដោយ ឯកឧត្តម ហ៊ុន ណេង ប្រធានគណៈកម្មការមហាផ្ទៃ ការពារជាតិ និង មុខងារសាធារណៈ ។ គណៈប្រតិភូរដ្ឋសភាប្រទេសវៀតណាមដឹកនាំដោយ ឯកឧត្តម ង្វៀន គីមខ័រ ប្រធានគណៈកម្មាធិការការពារប្រទេស និង សន្តិសុខ។ ចំណែកគណៈប្រតិភូរដ្ឋសភាប្រទេសឡាវ ដែលជាម្ចាស់ផ្ទះ គឺដឹកនាំដោយ ឯកឧត្តម វិទ្បៃ ដួងម៉ានីប្រធានគណៈកម្មាធិការការពារប្រទេស និងសន្តិសុខ។
មុនបិទកិច្ចប្រជុំ ដែលប្រធានគណៈប្រតិភូប្រទេសទំាងបី ត្រូវទាក់ដៃគ្នាបង្ហាញពីចំណងមិត្តភាពដ៏ស្អិតរមួត ឯកឧត្តម វិទ្បៃដួងម៉ានី បានថ្លែងអំណរគុណ ចំពោះ ឯកឧត្តម ហ៊ុន ណេង ឯកឧត្តម ង្វៀន គីមខ័រ ដែលបានដឹកនាំគណៈប្រតិភូចូលរួមកិច្ចប្រជុំប្រចាំឆ្នាំ លើកទី២នេះ និងបានជជែកផ្លាស់ប្តូរ ទស្សនៈយោបល់ យ៉ាងផុសផុល ដើម្បីជាប្រយោជន៍រួមនៃប្រជាជន និងប្រទេសទំាងបី ជាពិសេសប្រជាពលរដ្ឋរស់នៅ ក្នុងខេត្តទំាងអស់ របស់ប្រទេស ទំាងបី ក្នុងតំបន់ត្រីកោណអភិវឌ្ឍន៍។
សូមបញ្ជាក់ថា រដ្ឋាភិបាលប្រទេសកម្ពុជា ឡាវ និងវៀតណាម បានបង្កើត តំបន់អភិវឌ្ឍន៍ត្រីកោណកម្ពុជា ឡាវ និងវៀតណាម(CLV) នៅក្នុងខេត្តចំនួន១៣ ក្នុងនោះប្រទេសកម្ពុជាមានខេត្តចំនួន៤ គឺ ខេត្តស្ទឹងត្រែង រតនគីរី មណ្ឌលគីរី និងខេត្តក្រចេះ។ ប្រទេសឡាវមានចំនួន៤ខេត្ត និងប្រទេសវៀតណាម មានខេត្តចំនួន៥។ កិច្ចប្រជុំលើកទី៣ របស់គណៈកម្មការទទួលបន្ទុកវិស័យសន្តិសុខ ការពារជាតិ នៃរដ្ឋសភាកម្ពុជា ឡាវ វៀតណាមនេះ នឹងប្រារព្ធធ្វើនៅឆ្នាំ២០១៦ ខាងមុខ ដោយរដ្ឋសភាប្រទេសវៀតណាមទទួលធ្វើជាម្ចាស់ផ្ទះរៀបចំកិច្ចប្រជុំ៕
អត្ថបទនិងរូបភាពដោយនាយកដ្ឋានព័ត៌មាន