នៅព្រឹក ថ្ងៃទី២៧ ខែកញ្ញា ឆ្នាំ២០១៥ ឯកឧត្តម ងួន រាសី នាយកខុទ្ទកាល័យនិងជាតំណាងរបស់ ឯកឧត្តម បណ្ឌិត ងួន ញ៉ិល អនុប្រធាទី២ នៃរដ្ឋសភា បាននាំអំណោយជាគ្រឿងឧបភោគ បរិភោគ និងថវិកាមួយចំនួន ទៅចែកជូនប្រជាពលរដ្ឋក្រីក្រខ្វះខាតងាយរងគ្រោះចំនួន២៣គ្រួសារ ក្នុងស្រុកបារាយណ៍ខេត្តកំពង់ធំ។
ឯកឧត្តម ងួន រាសី បានមានប្រសាសន៍ថា កន្លងមក ឯកឧត្តមបណ្ឌិត ងួន ញ៉ិល អនុប្រធានទី២ រដ្ឋសភា តែងបានណែនាំដល់ អាជ្ញាធរមូលដ្ឋាន និងក្រុមការងារ អោយពិនិត្យចំពោះប្រជាពលរដ្ឋ ណាដែលមានជីវភាពក្រីក្រលំបាកខ្លាំង ឬក៏អ្នកជួបគ្រោះថ្នាក់ផ្សេងៗ ត្រូវចុះជួយដល់ពួកគាត់ជាបន្ទាន់។ ឯកឧត្តម ងួន រាសី បញ្ជាក់ថា ចំពោះប្រជាពលរដ្ឋងាយរងគ្រោះទាំង២៣គ្រួសារនេះ បន្ទាប់ពី ឯកឧត្តមបណ្ឌិត ងួន ញ៉ិល បានទទួលព័ត៌មានភ្លាម ឯកឧត្តមបានចាត់ចែងតំណាង ឲ្យនាំយកអំណោយជាគ្រឿងឧបភោគបរិភោគមកចែកជូន នៅពេលនេះតែម្ដង។
ប្រជាពលរដ្ឋងាយរងគ្រោះ បានថ្លែងឲ្យដឹងថា សកម្មភាពរបស់ថ្នាក់ដឹកនាំ ចុះមកសួរសុខទុក្ខ និងនាំយកនូវអំណោយផ្តល់ជូនដល់ពួកគាត់នេះ គឺបាន ធ្វើអោយពួកគាត់មានភាពកក់ក្ដៅ និងអាចបន្ធូបន្ថយនូវការលំបាកបានខ្លះ ហើយពួកគាត់យល់ឃើញថា ថ្នាក់ដឹកនាំ តែងគិតគួរជួយដោះស្រាយពី ទុក្ខលំបាករបស់ពួគគាត់ជានិច្ច។
ប្រជាពលរដ្ឋងាយរងគ្រោះ ដែលបានទទួលនូវអំណោយរបស់ ឯកឧត្តមបណ្ឌិត ងួន ញ៉ិល អនុប្រធានទី២ រដ្ឋសភានាឱកាសនេះ គឺពួកគាត់ជា អ្នកមានជំងឺប្រចាំកាយ ជនចាស់ជរាគ្មានទីពឹង ដែលជាមូលហេតុធ្វើអោយពួកគាត់ធ្លាក់ក្នុងភាពក្រីក្រនិងងាយរងគ្រោះ។
សូមបញ្ជាក់ថាអំណោយរបស់ ឯកឧត្តមបណ្ឌិត ងួន ញ៉ិល អនុប្រធានទី២ រដ្ឋសភា ដែល ឯកឧត្តម ងួន រាសី នាំទៅចែកជូនប្រជាពលរដ្ឋនាពេលនេះ ក្នុង១គ្រួសារទទួលបានអង្ករ៣០គីឡូ ថវិកា១០ម៉ឺនរៀល ព្រមទាំងមាន មី ទឹកត្រី ប៊ីចេង ស្ករស ត្រីខ មុង ភួយ ក្រម៉ា និងធុងទឹក ផងដែរ៕
អត្ថបទនិងរូបភាពពីនាយកដ្ឋានព័ត៌មាន