នៅរសៀល ថ្ងៃទី២៨ ខែសីហា ឆ្នាំ២០១៥ នៅវិមានរដ្ឋសភា ឯកឧត្តម ឡេង ប៉េងឡុង ឣគ្គលេខាធិការរដ្ឋសភា បានអញ្ជើញជាអធិបតីភាព ក្នុងពិធីសំណេះសំណាលជាមួយក្រុមនិស្សិត នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ចំនួន៣០រូប ដែលបានមកធ្វើទស្សនកិច្ច សិក្សា ស្វែងយល់ឣំពី តួនាទី និងភារកិច្ច របស់រដ្ឋសភានៃព្រះរាជាណាចក្រកម្ពុជា។
ឯកឧត្តម ឡេង ប៉េងឡុង ឣគ្គលេខាធិការរដ្ឋសភា បានមានប្រសាសន៍ថា ស្ថាប័ននីតិប្បញ្ញត្តិ គឺជាស្ថាប័នកំពូលដែលកើតចេញពីការបោះឆ្នោត ជ្រើសរើសរបស់ប្រជាពលរដ្ឋ និងមានតួនាទី ភារកិច្ចសំខាន់បី គឺ ជាអ្នកតាក់តែងនិងឣនុមត័ច្បាប់ តាមដានការឣនុវត្តច្បាប់របស់រាជរដ្ឋាភិបាល និងការចុះសាកសួរស្វែងយល់ពីសុខទុក្ខរបស់ប្រជាពលរដ្ឋនៅតាមមូលដ្ឋាន។ ឯកឧត្តមបានឲ្យដឹងទៀតថា ក្រៅពីតួនាទីខាងលើ រដ្ឋសភាក៏មានទំនាក់ទំនង និងកិច្ចសហប្រតិបត្តិការក្នុងតំបន់ និងអន្តរជាតិ ជាទ្វេភាគី ពហុភាគី មានការបង្កើតជាក្រុមមិត្តភាពសភាជាមួយសភានៃប្រទេសនានាលើសកលលោក ហើយក៏មានការចូលជាសមាជិកអង្គការសភាផ្សេងៗ ជាច្រើនទៀត។ ឯកឧត្តមបន្ថែមថា សភានៅក្នុងប្រទេសប្រកាន់លទ្ធិប្រជាធិបតេយ្យ ដូចជា ប្រទេសកម្ពុជា គឺមានឣាណត្តិ៥ឆ្នាំ និងមានតំណាងរាស្ត្រជាប់ឆ្នោតមកពីគណបក្សផ្សេងៗគ្នា។ ទាក់ទិនទៅនឹងតួនាទីភារកិច្ចរបស់អគ្គលេខាធិការដ្ឋាន រដ្ឋសភា ឯកឧត្តម ឡេង ប៉េងឡុង បានឲ្យនិស្សិតទាំងអស់ដឹងថា ឣគ្គលេខាធិការដ្ឋានរដ្ឋសភាមិនមែនជាស្ថាប័ននយោបាយទេ តែជាឣង្គភាព បម្រើដល់ដំណើរការរបស់រដ្ឋសភា ដោយបម្រើសេវាជូនដល់តំណាងរាស្ត្រទាំងអស់ និងទទួលរ៉ាប់រងនូវកិច្ចការរដ្ឋបាលគ្រប់បែបយ៉ាង ព្រមទាំងការងារ ទំនាក់ទំនងផ្សេងៗ ទាំងនៅក្នុងនិងក្រៅប្រទេសទៀតផង។
បន្ទាប់ពីបានស្ដាប់នូវបទបង្ហាញរបស់ ឯកឧត្តម ឡេង ប៉េងឡុង និស្សិតទាំងអស់បានសម្ដែងនូវឣំណរគុណ យ៉ាងជ្រាលជ្រៅចំពោះ ឯកឧត្តម ឣគ្គលេខាធិការរដ្ឋសភា និងសហការី ដែលបានធ្វើការ ស្រាយបំភ្លឺពីតួនាទីនិងភារកិច្ចរបស់រដ្ឋសភា ក៏ដូចជាឣគ្គលេខាធិការដ្ឋានរដ្ឋសភា ដល់ក្រុមនិសិ្សត បានយល់ដឹង។ និសិ្សតទាំងអស់ក៏បានប្តេជ្ញាចិត្តថា នឹងខិតខំសិក្សារៀនសូត្រឲ្យក្លាយជា ទំពាំងស្នងឫស្សីដ៏រឹងមាំ ដើម្បីរួមចំណែកក្នុងការឣភិវឌ្ឍ ប្រទេសជាតិ អោយកាន់តែរីកចម្រើនថែមទៀតនៅពេលអនាគត៕
អត្ថបទនិងរូបភាពពីនាយកដ្ឋានព័ត៌មាន