ឯកឧត្តមបណ្ឌិតរដ្ឋ ជាម យៀប ប្រធានគណៈកម្មការ សេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា បានដឹកនាំកិច្ចប្រជុំ ដើម្បីពិនិត្យលើសេចក្តីព្រាង គម្រោងឥណទាន ចំណាយថវិការដ្ឋប្រចាំឆ្នាំ២០១៦ របស់រដ្ឋសភា ដោយមានការចូលរួមពី ឯកឧត្តម ឡេង ប៉េងឡុង អគ្គលេខាធិការ រដ្ឋសភា ឯកឧត្តម សូរ វ៉ិចទ័រ អគ្គលេខាធិការរង ឯកឧត្តម មិត្ត ការ៉េន អគ្គលេខាធិការរង និងមន្ត្រីជាន់ខ្ពស់ផ្នែកហិរញ្ញវត្ថុ នៃអគ្គលេខា ធិការដ្ឋានរដ្ឋសភា ជាច្រើនរូបទៀត។ កិច្ចប្រជុំប្រារព្ធធ្វើនៅថ្ងៃទី២៧ ខែសីហា ឆ្នាំ២០១៥ នៅវិមានរដ្ឋសភា។
ឯកឧត្តមបណ្ឌិតរដ្ឋ ជាម យៀប បានមានប្រសាសន៍ថា សេចក្តីព្រាងគម្រោងឥណទាន ចំណាយថវិការដ្ឋប្រចាំឆ្នាំ២០១៦ របស់រដ្ឋសភា ជាសេចក្តីព្រាង មួយដ៏មានសារៈសំខាន់ ក្នុងការគ្រោងការចំណាយរបស់ស្ថាប័នរដ្ឋសភា ដោយមានការត្រួតពិនិត្យដ៏ត្រឹមត្រូវពីគណៈកម្មការ សេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា ជាមួយនិង អគ្គលេខាធិការរដ្ឋសភា និងមានការយល់ព្រមពីសម្តេចប្រធានរដ្ឋសភា។ ទន្ទឹមនឹងនោះក្របខ័ណ្ឌថវិកាឆ្នាំ២០១៦ ក៏នឹងត្រូវ រៀបចំឡើងក្នុងគោលដៅបន្តចលករកែទម្រង់ស៊ីជម្រៅ និងមុតស្រួចរបស់រាជរដ្ឋាភិបាល ដើម្បីសម្រេចបានជាបណ្តើរៗ នូវបំណងប្រាថ្នារបស់ប្រជាពលរដ្ឋ ហើយក្របខ័ណ្ឌថវិកានេះ ក៏បានឆ្លុះបញ្ចាំងនូវការបេ្តជ្ញាចិត្តយ៉ាងម៉ឺងម៉ាត់ និងឥតងាករេរបស់រាជរដ្ឋាភិបាល ក្នុងការបន្តរក្សាស្ថិរភាព នយោបាយ សន្តិសុខ និងសណ្តាប់ឆ្នាប់សង្គម ការបន្តពង្រឹង និងពង្រីកការអនុវត្តលិទ្ធិប្រជាធិបតេយ្យ ការបន្តរក្សាអោយបាននូវ ស្ថិរភាពម៉ាក្រូសេដ្ឋកិច្ច និងកំណើនសេដ្ឋកិច្ច ធានាបាននូវភាពស័ក្តិសិទ្ធិ និងប្រសិទ្ធភាពខ្ពស់ ក្នុងការគ្រប់គ្រងហិរញ្ញវត្ថុសាធារណៈដើម្បីសម្រេចបាននូវគោលដៅនៃការអភិវឌ្ឍ សេដ្ឋកិច្ច និងសង្គម ព្រមទាំងការកាត់បន្ថយភាពក្រីក្រ៕
អត្ថបទនិងរូបភាពពីនាយកដ្ឋានព័ត៌មាន
