សេចក្តីព្រាងច្បាប់ស្តីពី “ការអនុម័តយល់ព្រមលើកិច្ចព្រមព្រៀង ស្តីពីកិច្ចសហប្រតិបត្តិការពាណិជ្ជកម្ម និងសេដ្ឋកិច្ចរវាងរាជរដ្ឋាភិបាលនៃព្រះរាជា- ណាចក្រកម្ពុជា និងរដ្ឋាភិបាលនៃសាធារណរដ្ឋបេឡារុស” ត្រូវបានគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់នៃរដ្ឋសភា ដឹកនាំដោយ លោកជំទាវ និន សាផុន ប្រធានគណៈកម្មការ សហការជាមួយ គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ វប្បធម៌ និងព័ត៌មាននៃរដ្ឋសភា ដឹកនាំដោយ ឯកឧត្តម ឈាង វុន ព្រមទាំង ឯកឧត្តម លោកជំទាវ ជាតំណាងមកពីគណៈកម្មការជំនាញផ្សេងៗទៀតនៃរដ្ឋសភា លើកយកមកប្រជុំពិនិត្យនិងពិភាក្សាជាមួយ តំណាងរាជរដ្ឋាភិបាល ដែលដឹកនាំដោយ ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម នៅព្រឹកថ្ងៃទី២៧ ខែសីហា ឆ្នាំ២០១៥ នៅវិមាន រដ្ឋសភា។
លោកជំទាវ និន សាផុន បានជម្រាបជូនអង្គប្រជុំថា សេចក្តីព្រាងច្បាប់ស្ដីពី ការអនុម័តយល់ព្រមលើកិច្ចព្រមព្រៀង ស្តីពីកិច្ចសហប្រតិបត្តិការ ពាណិជ្ជកម្ម និងសេដ្ឋកិច្ចរវាងរាជរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាល នៃសាធារណរដ្ឋបេឡារុស ត្រូវបានរាជរដ្ឋាភិបាល បញ្ជូនមក រដ្ឋសភា កាលពីថ្ងៃទី១៣ ខែកក្កដា ឆ្នាំ២០១៥ ដោយមានភ្ជាប់មកនូវសេចក្តីថ្លែងហេតុ និងអត្ថបទសេចក្ដីព្រាងច្បាប់ មកជាមួយមាន៣មាត្រា។ គណៈកម្មាធិការអចិន្ត្រៃយ៍ នៃរដ្ឋសភាក៏បានសម្រេចប្រគល់ភារកិច្ច ឲ្យគណៈកម្មការទី៩ និងគណៈកម្មការទី៥ នៃរដ្ឋសភាធ្វើការសហការគ្នាក្នុងការ ពិនិត្យ និងសិក្សាស្រាវជ្រាវមុននឹងដាក់ចូលក្នុងសម័យប្រជុំពេញអង្គរដ្ឋសភានាពេលខាងមុខ។
ឯកឧត្ដម អ៊ុក ប្រជា រដ្ឋលេខាធិការក្រសួងពាណិជ្ជកម្ម បានមានប្រសាសន៍ថា កិច្ចព្រមព្រៀង ស្ដីពីកិច្ចសហប្រតិបត្តិការពាណិជ្ជកម្ម និងសេដ្ឋកិច្ចរវាង រាជរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាល នៃសាធារណរដ្ឋបេឡារុស មាន១៣មាត្រា ត្រូវបានចុះហត្ថលេខានៅទីក្រុង មីនស្ក នៃសាធារណរដ្ឋបេឡារុស នៅថ្ងៃទី២៣ ខែមេសា ឆ្នាំ២០១៤ ដោយរាជរដ្ឋាភិបាលកម្ពុជា និងរដ្ឋាភិបាលបេឡារុស។ នៅពេលកិច្ចព្រមព្រៀងនេះចូលជាធរមាន គឺមានសុពលភាពអនុវត្តរយៈពេល៥ឆ្នាំ ហើយនិងអាចបន្តបានជាស្វ័យប្រវត្តិ៥ឆ្នាំទៀត ក្រោយថ្ងៃទទួលបានការជូនដំណឹងតាមផ្លូវ ការទូត ដោយមានការព្រមព្រៀងរវាងប្រទេសទាំងពីរ។
ឯកឧត្ដម បន្តថា សេចក្តីព្រាងច្បាប់ស្តីពី “ការអនុម័តយល់ព្រមលើកិច្ចព្រមព្រៀង ស្តីពីកិច្ចសហប្រតិបត្តិការពាណិជ្ជកម្ម និងសេដ្ឋកិច្ចរវាងរាជរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋបេឡារុស”នេះ មានគោលបំណងពង្រីក និងពង្រឹងកិច្ចសហប្រតិបត្តិការពាណិជ្ជកម្ម និង សេដ្ឋកិច្ច រវាង ប្រទេសទាំង២ កម្ពុជា បេឡារុស ដើម្បីផលប្រយោជន៍ទៅវិញទៅមក។
បន្ទាប់ពីបានពិភាក្សាគ្នា យ៉ាងល្អិតល្អន់តាមនីតិវិធី គណៈកម្មការជំនាញនៃរដ្ឋសភា បានសម្រេចឯកភាពគ្នារក្សាខ្លឹមសារដើម នៃសេចក្តីព្រាងច្បាប់ ទាំងស្រុង ដដែល ហើយលោកជំទាវ និន សាផុន បានថ្លែងការកោតសរសើរនិងវាយតំលៃខ្ពស់ ចំពោះកិច្ចខិតខំប្រឹងប្រែងរបស់ក្រសួងពាណិជ្ជកម្ម ក៏ដូចជារាជរដ្ឋាភិបាលកម្ពុជា ដែលបានយកចិត្តទុកដាក់ក្នុងការជំរុញការអភិវឌ្ឍលើគ្រប់វិស័យ ជាពិសេសវិស័យពាណិជ្ជកម្មដែលកំពុងលេចធ្លោលើឆាកអន្តរជាតិ។
លោកជំទាវ និន សាផុន បានជម្រាបជូនតំណាងរាជរដ្ឋាភិបាលថា បន្ទាប់ពីបានពិនិត្យពិភាក្សាគ្នា នៅពេលនេះគណៈកម្មការជំនាញនៃរដ្ឋសភា នឹងបញ្ជូន សេចក្តីព្រាងច្បាប់នេះ ទៅគណៈកម្មាធិការអចិន្ត្រៃយ៍រដ្ឋសភា ធ្វើការពិនិត្យនិងសម្រេចដាក់បញ្ចូលក្នុងរបៀបវារៈ សម័យប្រជុំពេញអង្គ រដ្ឋសភា ដើម្បីធ្វើការពិភាក្សា និងអនុម័តនាពេលខាងមុខ សម្រាប់ឲ្យរាជរដ្ឋាភិបាលយកទៅអនុវត្តបម្រើផលប្រយោជន៍ប្រទេសជាតិនិងប្រជាពលរដ្ឋ៕
អត្ថបទនិងរូបភាពពីនាយកដ្ឋានព័ត៌មាន
