គណៈប្រតិភូ គណៈកម្មការផែនការ វិនិយោគ កសិកម្ម អភិវឌ្ឍន៏បទ បរិស្ថាន និងធនធានទឹកនៃរដ្ឋសភា ដឹកនាំដោយ ឯកឧត្តម ប៉ុល ហំម ប្រធានគណៈកម្មការ ចូលរួមដោយសមាជិកសមាជិកា បានអញ្ជើញចុះពិនិត្យសិក្សាការងារ កសាងហេដ្ឋារចនាសម្ព័ន្ធជនបទនានា របស់ក្រសួង អភិវឌ្ឍន៍ជនបទ នៅក្នុងខេត្តកំពង់ធំ នាថ្ងៃទី២៥ ខែសីហា ឆ្នាំ២០១៥ ។
ក្នុងដំណើរបំពេញបេសកកម្ម របស់គណៈកម្មការជំនាញរដ្ឋសភានេះ មានការចូលរួមដោយ ឯកឧត្តម សួស គង់ រដ្ឋលេខាធិការក្រសួងអភិវឌ្ឍន៍ជនបទ តំណាង ឯកឧត្តម ជា សុផារ៉ា រដ្ឋមន្រ្តីក្រសួង និងសហការីជាច្រើនរូបទៀត។
ជាដំបូង គណៈប្រតិភូ បានអញ្ជើញពិនិត្យការដ្ឋានសាងសង់ ស្ពានបន្ទាយចាស់ស្ថិតក្នុងស្រុកបារាយ។ បើតាមការបង្ហាញរបស់ លោក មុំ ចែម ប្រធានមន្ទីរអភិវឌ្ឍន៍ជនបទ ខេត្តកំពង់ធំ បានឲ្យដឹងថា ស្ពានបន្ទាយចាស់នេះ ធ្វើពីបេតុង មានបណ្តោយប្រវែង៦០ម៉ែត្រ និងមានទទឹង៧ ម៉ែត្រ។ ជាគម្រោងជំនួយឥតសំណង របស់ធនាគារពិភពលោក ដល់រាជរដ្ឋាភិបាកម្ពុជា អនុវត្តគម្រោងផ្ទាល់ដោយក្រសួងអភិវឌ្ឍន៍ជនបទ។
លោកប្រធានមន្ទីរបានគូសបញ្ជាក់ថា ស្ពាននេះជាសរសៃឈាមសេដ្ឋកិច្ចដ៍សំខាន់ ក្នុងការតភ្ជាប់ ការរស់នៅ ការដឹកជញ្ជួន របស់ប្រជាពលរដ្ឋក្នុងមូលដ្ឋាន ទៅតំបន់នានា ។
បន្ទាប់មកទៀត គណៈប្រតិភូ ក៍បានបន្តដំណើរទៅកាន់ សាលាស្រុកសណ្តាន់ ដើម្បីពិនិត្យមើលផ្លូវក្រាលកៅស៊ូ ចម្ងាយ៧០គីទ្បូម៉ែត្រ ដែលស្ថិតក្នុងគម្រោងកែលម្អផ្លូវជនបទ។
នៅក្នុងដំណើរ បំពេញបេសកកម្មនេះ ឯកឧត្តម ប៉ុល ហំម បានសម្តែងការអរគុណ និងកោតសរសើរ ចំពោះក្រសួងអភិវឌ្ឍន៍ជនបទ ដែលបានខិតខំគៀងគរថវិកា យកមកកសាងសមិទ្ធផលជនបទជាច្រើន ដែលមាន ស្ពាន ផ្លូវ ជាដើមនេះ ដើម្បីបម្រើផលប្រយោជន៍ជូនប្រជាពលរដ្ឋនៅទីជនបទ ក្នុងការលើកកម្ពស់ជីវភាពរស់នៅរបស់គាត់ឲ្យបានល្អប្រសើរ ។
ជាមួយគ្នានេះ ក្នុងនាមជាតំណាងរាស្រ្តមណ្ឌល ខេត្តកំពង់ធំ ឯកឧត្តម ជា អឿង ដែលជាសមាជិកគណៈកម្មការផែនការ វិនិយោគ កសិកម្ម អភិវឌ្ឍន៏បទ បរិស្ថាន និងធនធានទឹកនៃរដ្ឋសភា ផងនោះ បានលើកទ្បើងថាប្រជាពលរដ្ឋក្នុងខេត្តកំពង់ធំ មានក្តីត្រេកអរជាខ្លំាងចំពោះរាជរដ្ឋាភិបាល និងក្រសួងអភិវឌ្ឍន៍ជនបទដែលបានគិតគូរពីសុខទុក្ខ ប្រជាពលរដ្ឋនៅជនបទ តាមរយៈ ការអភិវឌ្ឍហេដ្ឋារចនាសម្ព័ន្ធនានា ជួយសម្រួលការលំបាករបស់ពួកគាត់ ពិសេស ការធ្វើដំណើររបស់កូនចៅទៅសាសារៀនឲ្យមានភាពងាយស្រួល មិនលំបាកដូចពេលមុន៕