ក្រោយពីបានបញ្ចប់ដំណើរទស្សនកិច្ច នៅសាធារណរដ្ឋឥណ្ឌូនេស៊ី ដោយបានចាប់ផ្ដើមតាំងពីថ្ងៃទី១៨ ដល់ថ្ងៃទី២៣ ខែសីហា ឆ្នាំ២០១៥ គណៈប្រតិភូគណៈកម្មការជំនាញរដ្ឋសភាដឹកនាំដោយ លោកជំទាវ កែ សុវណ្ណរតន៍ ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និង កិច្ចការនារី បានធ្វើមាតុភូមិនិវត្តន៍មកដល់ ព្រះរាជាណាចក្រកម្ពុជា ប្រកបដោយសុវត្ថិភាព នៅ ល្ងាចថ្ងៃទី២៣ ខែសីហា ឆ្នាំ២០១៥។
នៅឯអាកាសយានដ្ឋានអន្តរជាតិភ្នំពេញ លោកជំទាវប្រធានគណៈប្រតិភូបានមានប្រសាសន៍ អោយដឹងថា នៅក្នុងដំណើរទស្សនកិច្ចនេះ គឺគណៈប្រតិភូ បានទទួលនូវបទពិសោធន៍ជាច្រើនពីប្រទេសឥណ្ឌូនេស៊ី អំពីការអនុវត្តរបបសន្តិសុខសង្គម ដោយនៅប្រទេសឥណ្ឌូនេស៊ី គឺគេបានបង្កើតនូវប្រព័ន្ធគ្របដណ្តប់សុខភាពជាសកល តាំងពីឆ្នាំ២០០៤ ហើយសេចក្តីព្រាងច្បាប់ស្ដីពីរបបសន្តិសុខសង្គម គេបានអនុម័តនៅឆ្នាំ២០១៤ ដោយមានគោលដៅគាំពារចំពោះប្រជាពលរដ្ឋក្រីក្រ និងប្រជាពលរដ្ឋងាយរងគ្រោះនៅប្រទេសឥណ្ឌូនេស៊ី។
លោកជំទាវបន្ថែមថា គម្រោងសេវាគ្របដណ្តប់សុខភាពសាធារណៈ ជាប្រព័ន្ធធានារ៉ាប់រងសន្តិសុខសង្គម ដោយមានពាក្យស្លោកមួយគឺ «អ្នកអត់ឈឺ ជួយអ្នកឈឺ»។ លោកជំទាវឲ្យដឹងទៀតថា គម្រោងរបបសន្តិសុខសង្គមនេះ មិនមែនគ្រប់គ្រងដោយរដ្ឋាភិបាលផ្ទាល់ទេ គឺរដ្ឋបង្កើតក្រុមហ៊ុនមួយ មានឈ្មោះថា ក្រុមប្រឹក្សាសន្តិសុខជាតិ គឺគេធ្វើការជាមួយមន្ទីរពេទ្យ និងមណ្ឌលសុខភាព។ ចំពោះប្រជាពលរដ្ឋក្រីក្រ និងអ្នកងាយរងគ្រោះ គឺរបបសន្តិសុខសង្គមរបស់ប្រទេសឥណ្ឌូនេស៊ី ជួយដល់អ្នកទាំងនោះដោយមិនមានបង់ថវិកានោះទេ ដោយរដ្ឋាភិបាលជាអ្នកផ្គត់ផ្គង់សេវាសាធារណៈ។ លោកជំទាវ កែ សុវណ្ណរតន៍ បានបន្តថា ចំពោះដំណើរទស្សនកិច្ចរយៈពេល៥ថ្ងៃ នៅសាធារណរដ្ឋឥណ្ឌូនេស៊ី ពាក់ព័ន្ធទៅនឹងការគ្របដណ្តប់សុខភាព ជាសកលនាពេលនេះ គឺរៀបចំឡើងដោយអង្គការ GIZ របស់ប្រទេសអាឡឺម៉ង់ ហើយ GIZ ក៏ជាដៃគូរបស់រាជរដ្ឋាភិបាលកម្ពុជាដែរ ដោយបាន ជួយដល់រាជរដ្ឋាភិបាល និងកំពុងតែអនុវត្តនូវការងារទាំងអស់នេះ ដោយផ្តោតសំខាន់ទៅលើប្រជាពលរដ្ឋក្រីក្រ និងប្រជាពលរដ្ឋងាយរងគ្រោះ ដែលបច្ចុប្បន្នអង្គការ GIZ បានបង្កើតគម្រោងមូលនិធិសមធម៌ នៅខេត្តកំពង់ធំ ខេត្តកំពត និងត្រៀមធ្វើនៅខេត្តកំពង់ស្ពឺ ជាបន្តទៀត ហើយមូលនិធិសមធម៌នេះ គឺរាជរដ្ឋាភិបាលកម្ពុជាជួយ៤០% អង្គការGIZជួយ៦០%។
លោកជំទាវប្រធាន ក៏បានលើកឡើងដែរថា ប្រទេសកម្ពុជា ក៏គួររៀបចំឲ្យមានច្បាប់ស្ដីពីរបបសន្តិសុខសង្គមនេះ ឡើងដែរ ដើម្បីជួយដល់ ប្រជាពលរដ្ឋ ក្រីក្រ និងប្រជាពលដែលងាយរងគ្រោះ។
អត្ថបទនិងរូបភាពពីនាយកដ្ឋានព័ត៌មាន
