គណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា ដឹកនាំដោយ ឯកឧត្តម យ៉ែម បុញ្ញឫទ្ធិ ប្រធានគណៈកម្មការ បានទទួលជួបពិភាក្សាការងារជាមួយ លោក ជិន ច័ន្ទវាសនា នាយកប្រតិបត្តិអង្គការសង្គមស៊ីវិល ភាពជាដៃគូរអប់រំនៃអង្គការក្រៅរដ្ឋាភិបាល ហៅកាត់ថា NEPនៅព្រឹក ថ្ងៃទី២៩ ខែកក្កដា ឆ្នាំ២០១៥ នៅវិមានរដ្ឋសភា។
ឯកឧត្តម យ៉ែម បុញ្ញឫទ្ធិ បានមានប្រសាសន៍ថា នៅក្នុងជំនួបពិភាក្សា ជាមួយអង្គការNEPនាពេលនេះ គឺខាងអង្គការNEPចង់ធ្វើបទបង្ហាញនូវអ្វីដែល ខ្លួនកំពុងធ្វើពាក់ព័ន្ធនឹងវិស័យអប់រំ ហើយដែលគណៈកម្មការទី៧ក៏ចង់អោយអង្គការNEPសហការជាមួយ នៅក្នុងដំណើរការកែទម្រង់ទៅលើវិស័យអប់រំនៅកម្ពុជានេះដែរ។
សូមបញ្ជាក់ថា លោក ជិន ច័ន្ទវាសនា ជានាយកប្រតិបត្តិអង្គការសង្គមស៊ីវិលភាពជាដៃគូរអប់រំនៃអង្គការក្រៅរដ្ឋាភិបាលNEPតំណាងអោយ ១៣៥អង្គការសង្គមស៊ីវិល ដោយធ្វើការជាក់លាក់ទៅលើវិស័យអប់រំជាសំខាន់ ក្នុងការតាមដាននិងកែប្រែគោលនយោបាយ ដែលមានទស្សនៈវិស័យ ធ្វើការរួមគ្នា ដើម្បីសំរេចបាននូវការអប់រំដែលមានគុណភាពប្រកបដោយសមធម៌ និងអោយទាន់ពេលវេលាដល់ប្រជាជនកម្ពុជា ក្នុងការលើកកម្ពស់ គុណភាពអប់រំនៅកម្ពុជា៕
អត្ថបទនិងរូបភាពពីនាយកដ្ឋានព័ត៌មាន