នៅវិមានរដ្ឋសភា នាព្រឹកថ្ងៃសុក្រ ទី០៣ ខែកក្កដា ឆ្នាំ២០១៥ វេលាម៉ោង០៨:០០នាទី គណៈកម្មាធិការអចិន្ត្រៃយ៍រដ្ឋសភា នៃព្រះរាជាណាចក្រកម្ពុជា បានបើកកិច្ចប្រជុំក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាពញាចក្រី ហេង សំរិន ប្រធានរដ្ឋសភា។
អង្គប្រជុំបានធ្វើការពិភាក្សា និងអនុម័តយល់ព្រមលើសំណើសុំប្រកាសទទួលស្គាល់ ឯកឧត្តម កែវ ពិសិដ្ឋ ជាតំណាងរាស្រ្តថ្មីនៃមណ្ឌលខេត្តកំពង់ចាម ជំនួស លោកជំទាវ ចែម សាវ៉ៃ ដែលបានសុំលាលែងនិងសំណើសុំប្រកាសទទួលស្គាល់ ឯកឧត្តម ងួន ប៊ៀន ជាតំណាងរាស្រ្តថ្មីនៃមណ្ឌលខេត្តកែបជំនួស ឯកឧត្តម អាន ហេ ដែលបានសុំលាលែង។
អង្គប្រជុំគណៈកម្មាធិការអចិន្ត្រៃយ៍នៃរដ្ឋសភាបានអនុម័តយល់ព្រម លើសំណើសុំជ្រើសតំាង ឯកឧត្តម កែវ ពិសិដ្ឋ ជាសមាជិក គណៈកម្មការនីតិកម្ម និងយុត្តិធម៌នៃរដ្ឋសភា និងបានអនុម័តយល់ព្រម បញ្ចូលក្នុងរបៀបវារៈ សម័យប្រជុំរដ្ឋសភា លើកទី៤ នីតិកាលទី៥ នូវសេចក្តីស្នើច្បាប់ស្តីពី ភតិសន្យាពិសេស។
អង្គប្រជុំក៏បានអនុម័តយល់ព្រម កំណត់កាលបរិច្ឆេទបន្តសម័យប្រជុំរដ្ឋសភាលើកទី៤ នីតិកាលទី៥ នៅថ្ងៃចន្ទ ទី០៦ ខែកក្កដា ឆ្នាំ២០១៥ វេលាម៉ោង៨:០០ នាទីព្រឹក ដើម្បីពិភាក្សានិងអនុម័ត លើសេចក្តីស្នើច្បាប់ស្តីពី ភតិសន្យាពិសេស។
អត្ថបទនិងរូបភាពពីនាយកដ្ឋានព័ត៌មាន
