នាព្រឹកថ្ងៃទី០២ ខែកក្កដា ឆ្នាំ២០១៥ នៅវិមានរដ្ឋសភា គណៈកម្មការនីតិកម្មនិងយុត្តិធម៌នៃ រដ្ឋសភាដឹកនាំដោយឯក ឧត្តមបណ្ឌិត ប៉ែន បញ្ញា ប្រធានគណៈកម្មការ បានជួបប្រជុំពិភាក្សាការងារជាមួយ ឯកឧត្តម អ៊ូ ច័ន្ទឫទ្ធិ តំណាងក្រុមតំណាងរាស្រ្តហត្ថលេខីនៃសេចក្តីស្នើច្បាប់ស្តីពី ភតិសន្យាពិសេស និងដោយមានការចូលរួមពីឯកឧត្តម លោកជំទាវ មកពី គណៈកម្មការជំនាញនានានៃរដ្ឋសភា ។
ឯកឧត្តមបណ្ឌិត ប៉ែន បញ្ញា បានមានប្រសាសន៍ថា តំណាងរាស្រ្ត គណបក្សប្រជាជនកម្ពុជា និងគណបក្សសង្គ្រោះជាតិ ចំនួន៦៣រូប បានធ្វើការពិនិត្យសិក្សា និង រៀបចំតាក់តែងសេចក្តីស្នើច្បាប់ស្តីពី ភតិសន្យាពិសេស នេះឡើង គឺស្របតាមស្មារតី រដ្ឋធម្មនុញ្ញ នៃព្រះរាជាណាចក្រកម្ពុជា ពិសេសសិទ្ធិមានលំនៅដ្ឋាន សំដៅរួមចំណែកដោះស្រាយបញ្ហាសង្គម រួមមានការលំបាក និងសំណូមពររបស់កម្មករ សិស្ស និស្សិត ដែលស្នាក់នៅបន្ទប់ជួល ក៏ដូចជាម្ចាស់អចលនៈទ្រព្យ ហើយក៏ជាការឆ្លើយតបទៅនឹងការពង្រឹងនីតិរដ្ឋ ដើម្បីស្ថេិភាព ក្នុងជីវភាពរស់នៅ របស់ប្រជាពលរដ្ឋ សណ្តាប់ធ្នាប់ និង របៀបរៀបរយសាធារណៈនិងផ្អែកទៅលើស្ថានភាពជាក់ស្តែងផងដែរ។
ឯកឧត្តមបណ្ឌិត ប៉ែន បញ្ញា បានបញ្ជាក់ថាសេចក្តីស្នើច្បាប់នេះ មានគោលបំណងគ្រប់គ្រងបន្ទប់ជួលនិងទំនាក់ទំនងរវាងកម្មករ សិស្ស និស្សិត ជាមួយនឹងម្ចាស់ផ្ទះដែលមានបន្ទប់ជួលស្នាក់នៅ អោយមានលក្ខណៈរៀបរយព្រមទាំងជួយដោះស្រាយសំណូមពររបស់ កម្មករ សិស្ស និស្សិត ទាក់ទងនឹងតម្លៃបន្ទប់ជួល សមស្របនិងប្រាក់កំរៃគោលប្រចាំខែទាប ដែលកំរិតកំណត់ដោយអនុក្រឹត្យ និងការពារផលប្រយោជន៍ស្របច្បាប់ របស់ភតិបតី (ម្ចាស់ផ្ទះដែលមានបន្ទប់ជួល)។
ឯកឧត្តមបណ្ឌិតបានលើកឡើងថា សេចក្តីស្នើច្បាប់ស្ដីពីភតិសន្យាពិសេសនេះ ជាមូលដ្ឋានគតិយុត្តជាក់លាក់មួយនៅក្នុងប្រព័ន្ធនីតិរបស់កម្ពុជា បន្ថែមលើក្រមរដ្ឋប្បវេណីស្តីពីភតិសន្យា ដែលត្រូវយកមកអនុវត្តនៅក្នុងករណីនៃកិច្ចសន្យាជួល ។
បន្ទាប់ពីការពិនិត្យពិភាក្សាគ្នាទៅលើខ្លឹមសារ ពាក្យពេចន៍ និងអក្ខរាវិរុទ្ធនៃសេចក្តីស្នើច្បាប់ស្តីពីភតិសន្យាពិសេស រវាងគណៈកម្មការជំនាញ នៃរដ្ឋសភា ជាមួយតំណាង ក្រុមតំណាងរាស្រ្តហត្ថលេខីរួចមក ឯកឧត្តមបណ្ឌិត ប៉ែន បញ្ញា បានមានប្រសាសន៍ថា ឯកឧត្ដមនឹងរៀបចំ បញ្ជូនសេចក្តីស្នើច្បាប់ស្ដីពីភតិសន្យាពិសេស ដែលមាន៤ជំពូក ចែកចេញ១១មាត្រានេះ ទៅគណៈកម្មាធិការអចិន្ត្រៃយ៍រដ្ឋសភា ដើម្បីសម្រេច ដាក់ចូលក្នុងរបៀបវារៈសម័យប្រជុំរដ្ឋសភានាពេលខាងមុខ។
អត្ថបទនិងរូបភាពពីនាយកដ្ឋានព័ត៌មាន
