នារសៀលថ្ងៃទី២៩ ខែមិថុនា ឆ្នាំ២០១៥ នៅវិមានរដ្ឋសភា គណៈកម្មការកិច្ចការបរទេស សហប្រតិបត្តិការ អន្តរជាតិ ឃោសនាការ និងព័ត៌មាន នៃរដ្ឋសភា ដឹកនាំដោយ ឯកឧត្តម ឈាង វុន ប្រធានគណៈកម្មការ បានរៀបចំ កិច្ចប្រជុំផ្ទៃក្នុង គណៈកម្មការ ដើម្បីពិនិត្យពិភាក្សានិងសិក្សាលើសេចក្តីព្រាងច្បាប់ ស្ដីពីសមាគម និង អង្គការមិនមែនរដ្ឋាភិបាល។
ឯកឧត្តម ឈាង វុន ប្រធានគណៈកម្មការ បានមានប្រសាសន៍ថា សេចក្តីព្រាងច្បាប់ស្ដីពីសមាគម និងអង្គការ មិនមែនរដ្ឋាភិបាល មានចំនួន៩ជំពូក រួមមាន៣៩មាត្រា ត្រូវបាន កិច្ចប្រជុំគណៈកម្មាធិការ អចិន្ត្រៃយ៍រដ្ឋសភា ប្រគល់ជូន គណៈកម្មការកិច្ចការបរទេស សហប្រតិបត្តិការ អន្តរជាតិ ឃោសនាការ និងព័ត៌មាន នៃរដ្ឋសភា ពិនិត្យ និងសិក្សា ដោយសហការជាមួយគណៈកម្មការមហាផ្ទៃ ការពារជាតិ និងមុខងារសាធារណៈ និង គណៈកម្មការនីតិកម្ម និងយុត្តិធម៌ នៃរដ្ឋសភា បន្ទាប់មកត្រូវធ្វើរបាយការណ៍ ជូនគណៈកម្មាធិការអចិន្ត្រៃយ៍រដ្ឋសភាវិញ មុននឹងសម្រេចដាក់ចូល ក្នុង របៀបវារៈសម័យប្រជុំពេញអង្គរដ្ឋសភានាពេលខាងមុខ។
ឯកឧត្តម បញ្ជាក់ថា បន្ទាប់ពីកិច្ចប្រជុំផ្ទៃក្នុង គណៈកម្មការជំនាញនីមួយៗ នៃរដ្ឋសភា ដែលទទួលភារកិច្ច ពិនិត្យនិងសិក្សា សេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល ពីគណៈកម្មាធិការអចិន្ត្រៃយ៍ រដ្ឋសភារួចហើយនោះ នៅពេលខាងមុខឆាប់ៗនេះ ក៏នឹងមានកិច្ចប្រជុំ អន្តរគណៈកម្មការ បន្ទាប់មកទៀត នឹងមានការរៀបចំសិក្ខាសាលាពិគ្រោះយោបល់មួយ ពីសេចក្តីព្រាងច្បាប់នេះ នៅថ្ងៃទី១០ ខែកក្កដា ឆ្នាំ២០១៥ ដោយមានការចូលរួមពីអង្គទូតនានាប្រចាំនៅកម្ពុជា អង្គការជាតិ អន្តរជាតិ តំណាងក្រសួងពាក់ព័ន្ធ រដ្ឋសភា និងព្រឹទ្ធសភាផងដែរ។
បន្ទាប់ពីបានពិនិត្យ ពិភាក្សា ទៅលើខ្លឹមសារ និងអក្ខរាវិរុទ្ធ នៃសេចក្ដីព្រាងច្បាប់ អង្គប្រជុំផ្ទៃក្នុងគណៈកម្មការទី៥ នៃរដ្ឋសភា ក៏បានធ្វើការកែសម្រួល ពាក្យពេចន៍មួយចំនួន អោយត្រូវតាមអក្ខរក្រមនៃវចនានុក្រមនិងទម្រង់ច្បាប់។
អត្ថបទនិងរូបភាពពីនាយកដ្ឋានព័ត៌មាន