«ស្ថាប័ននីតិប្បញ្ញត្តិដើរតួនាទីសំខាន់ ក្នុងការប្រយុទ្ធប្រឆាំងអំពើពុករលួយ តាមរយៈតួនាទីតាមដានត្រួតពិនិត្យ ការអនុវត្តច្បាប់ ការតាក់តែងច្បាប់ និងតួនាទីភាពជាតំណាង» នេះជាប្រសាសន៍របស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា ដែលបានថ្លែងនៅក្នុងពិធីបើកសិក្ខាសាលាសភាស្តីពីការឈ្វេងយល់ពីច្បាប់ និងការអនុវត្តច្បាប់ ស្តីពីការប្រឆាំងអំពើរពុករលួយ ដែលរៀបចំដោយគណៈកម្មការអង្កេត បោសសំអាត និងប្រឆាំងអំពើពុករលួយ នៃរដ្ឋសភា និងព្រឹទ្ធសភា ដោយមានការចូលរួមឧបត្ថម្ភគាំទ្រដោយ អគ្គលេខាធិការដ្ឋានរដ្ឋសភា លេខាធិការដ្ឋានសម្របសម្រួលបច្ចេកទេស ( TCS ) វិទ្យាស្ថានសភាកម្ពុជា ( PIC ) និង អង្គការតម្លាភាពកម្ពុជា (TIC)នាព្រឹកថ្ងៃទី២៦ ខែឧសភា ឆ្នាំ២០១៥ នៅវិមានរដ្ឋសភា ។
ក្នុងឱកាសនោះដែរសម្តេចប្រធានរដ្ឋសភា ក៏បានផ្តល់អនុសាសន៍ដល់អង្គសិក្ខាសាលាថា ទី១-ត្រូវបន្តជម្រុញផ្សព្វផ្សាយ និងលើកកម្ពស់ការយល់ដឹង របស់ប្រជាពលរដ្ឋ ជាពិសេសយុវជនអោយបានយល់ច្បាស់អំពីច្បាប់ ប្រឆាំងអំពើពុករលួយ អំពីផលវិបាក និងឥទ្ធិពលអវិជ្ជមាននៃអំពើពុករលួយ ទី២- ត្រូវពង្រឹងនិងលើកកម្ពស់តួនាទីសំខាន់ទាំងបីរបស់ខ្លួនជា ពិសេសតួនាទីតាមដានត្រួតពិនិត្យការអនុវត្តច្បាប់ដើម្បីធានាការប្រើប្រាស់ធនធានរបស់រដ្ឋប្រកបដោយប្រសិទ្ធភាព គណនេយ្យភាព និងប្រសិទ្ធផលខ្ពស់ ជៀសផុតពីការកេងប្រវ័ញ្ច និងប្រព្រឹត្តអំពើពុករលួយ ទី៣- ត្រូវអំពាវនាវ និងលើកទឹកចិត្ត ដល់ប្រជាពលរដ្ឋ ត្រូវចូលរួមយ៉ាង សកម្មក្នុងការប្រឆាំងអំពើពុករលួយ ដោយត្រូវមានភាពក្លាហានក្នុងការប្តឹងនិងថ្កោលទោស ចំពោះជនណាដែល ប្រព្រឹត្តអំពើពុករលួយ ទី៤- ស្នើគណៈកម្មការពាក់ព័ន្ធរបស់សភា ជាពិសេសគណៈកម្មការទី១០ ត្រូវបន្តពង្រឹងនិងតាមដាន ការអនុវត្តច្បាប់ និងពិនិត្យ ពីភាពខ្វះចន្លោះនៃក្របខណ្ឌច្បាប់សំដៅធ្វើការកែលម្អនិងវិសោធនកម្មច្បាប់ពាក់ព័ន្ធនានា ដើម្បីទទួលបាននូវប្រសិទ្ធភាពនិងប្រសិទ្ធផលខ្ពស់ និងទី៥- សូមជម្រុញ និងលើកទឹកចិត្តដល់គ្រប់ភាគីពាក់ព័ន្ធ ជាពិសេសវិស័យ ឯកជន អង្គការសង្គមស៊ីវិល និងប្រព័ន្ធព័ត៌មាន ត្រូវបន្តកិច្ចសហការគ្នា ក្នុងការ លើកកម្ពស់ការយល់ដឹង ការទប់ស្កាត់ និងការប្រឆាំងអំពើពុករលួយ។
ឯកឧត្តម ហូរ វ៉ាន់ ប្រធានគណៈកម្មការអង្កេត បោសសំអាត និងប្រឆាំងអំពើពុករលួយ នៃរដ្ឋសភា បានមានប្រសាសន៍ថា សិក្ខាសាលានាពេលនេះ គឺជាឱកាសមួយសម្រាប់ឈ្វេងយល់ពីច្បាប់ជាតិពីរ គឺច្បាប់ស្តីពីការប្រឆាំងអំពើពុករលួយ និងច្បាប់ស្តីពីសវនកម្មនៃព្រះរាជាណាចក្រកម្ពុជា និងអនុសញ្ញាអង្គការសហប្រជាជាតិប្រឆាំងអំពើពុករលួយ ព្រមទាំងឈ្វេងយល់ពីការអនុវត្តច្បាប់និងអនុសញ្ញាទាំងនេះ ហើយក៏ជាឱកាសសម្រាប់ ស្វែងយល់ ដឹងពីបទពិសោធន៍ពីក្នុងនិងក្រៅប្រទេសផងដែរ ។
សូមបញ្ជាក់ថា សិក្ខាសាលាសភាស្តីពីការឈ្វេងយល់ពីច្បាប់ និងការអនុវត្តច្បាប់ស្តីពីការប្រឆាំងអំពើពុករលួយ មានការចូលរួមពីសំណាក់ ឯកឧត្តម លោកជំទាវ ជាសមាជិក សមាជិកា រដ្ឋសភា ព្រឹទ្ធសភា ថ្នាក់ដឹកនាំអង្គភាពប្រឆាំងអំពើរពុករលួយ អាជ្ញាធរសវនកម្មជាតិ និងឯកឧត្តម លោកជំទាវ លោក លោកស្រីជាភ្ញៀវជាតិ អន្តរជាតិ មកពីក្រសួង ស្ថាប័ននានាផងដែរ ។
អត្ថបទនិងរូបភាពពីនាយកដ្ឋានព័ត៌មាន
