នៅរសៀលថ្ងៃទី២៥ខែឧសភា ឆ្នាំ២០១៥ គណៈកម្មការ ផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក ដឹកនាំដោយ ឯកឧត្តម ប៉ុល ហំមប្រធានគណៈកម្មការ អមដំណើរដោយឯកឧត្តម លោកជំទាវ នៅក្នុងគណៈកម្មការ បានអញ្ជើញទៅកាន់ក្រសួងបរិស្ថានក្នុងរាជធានីភ្នំពេញ ដើម្បីជួបពិភាក្សាការងារ ជាមួយឯកឧត្តម សាយ សំអាល់រដ្ឋមន្ត្រីក្រសួងបរិស្ថាន លើកិច្ចការពារបរិស្ថាន និងធនធានធម្មជាតិ។
ឯកឧត្តម ប៉ុល ហំម បានមានប្រសាសន៍កោតសរសើរ ចំពោះឯកឧត្តម សាយ សំអាល់ រដ្ឋមន្ត្រីក្រសួងបរិស្ថានដែល បានបំពេញភារកិច្ច បាន ល្អប្រសើរ ជាពិសេសបានយកចិត្តទុកដាក់ក្នុងការ ដោះស្រាយទំនាស់ដីធ្លីជូនប្រជាពលរដ្ឋដែលរស់នៅប៉ះពាល់តំបន់ការពារបរិស្ថាន។ ឯកឧត្តម ក៏បានជម្រាបជូនពីគោលបំណងដែលគណៈកម្មការទី៣នៃរដ្ឋសភា មកជួបពិភាក្សានាពេលនេះគឺដើម្បីចង់សិក្សាស្វែងយល់ពីលទ្ធផលការងារ និងវិធានការ ការពារបរិស្ថាននិងធនធានធម្មជាតិរបស់ក្រសួងដើម្បីគណៈកម្មការជំនាញ នៃរដ្ឋសភាដែលទទួលបន្ទុកវិស័យនេះផ្តល់ជាគំនិត យោបល់ ក្នុងការរួមចំណែកធ្វើអោយវិស័យនេះ មានការអភិវឌ្ឍន៍រីកចម្រើនឡើង ។
នៅក្នុងឱកាសនោះ ឯកឧត្តម សាយ សំអាល់រដ្ឋមន្ត្រីក្រសួងបរិស្ថាន បានមានប្រសាសន៍ថា ក្រោមគោលនយោបាយយុទ្ធសាស្រ្ត ចតុកោណដំណាក់កាលទី៣ នៃរាជរដ្ឋាភិបាលអាណត្តិទី៥ ក្រសួងបរិស្ថាន បានយកចិត្តទុក ដាក់បំពេញភារកិច្ចដោយមានការទទួលខុសត្រូវ ជាពិសេសវិធានការការពារបរិស្ថាននិងធនធានធម្មជាតិ ដោយបានធ្វើការផ្សព្វផ្សាយ ច្បាប់និងអនុក្រឹត្យ អោយប្រជាពលរដ្ឋ បានយល់និង ជួយថែរក្សាការពារនូវធនធានធម្មជាតិទាំងនោះ ដើម្បីបម្រើដល់ការរស់នៅរបស់ប្រជាពលរដ្ឋ។ ទន្ទឹមនឹងកិច្ចខំប្រឹងប្រែងថែរក្សាការពារបរិស្ថាន និងធនធានធម្មជាតិដោយការយកចិត្តទុកដាក់យ៉ាងណាក្តី ក៏ក្រសួងបរិស្ថាននៅមានបញ្ហាប្រឈមមួយចំនួន ដូចជា ក្រុមហ៊ុនឯកជនខ្លះមិន បានយកចិត្តទុកដាក់ជួយថែរក្សាបរិស្ថាន បែរជាបង្ហូរកាកសំណល់ធ្វើឲ្យប៉ះពាល់បរិស្ថាន និងការរស់នៅរបស់ប្រជាពលរដ្ឋចូលក្នុងប្រភពទឹក ប្រើប្រាស់ ហើយក្រសួងក៏បានចាត់វិធានការអប់រំ និងឈានទៅដាក់ទណ្ឌកម្មតាមផ្លូវច្បាប់ ក្នុងករណីក្រុមហ៊ុនទាំងនោះនៅតែ ប្រព្រឹត្តកំហុស ដដែលទៀត៕
អត្ថបទនិងរូបភាពពីនាយកដ្ឋានព័ត៌មាន