ឯកឧត្តម ឈាង វុន ប្រធានគណៈកម្មការ កិច្ចការបរទេស សហប្រតិបត្តិការអន្តរជាតិ ឃោសនា ការ និងព័ត៌មាន នៃរដ្ឋសភា ដោយមានការចូលរួមពី លោកជំទាវ ក្រួច សំអាន លេខាធិការគណៈកម្មការ និតិកម្ម និងយុតិ្តធម៌ និង ឯកឧត្តម លោកជំទាវ តំណាងគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនង រដ្ឋសភា ព្រឹទ្ធសភា បានជួប ពិភាក្សា ការងារជាមួយ លោក ស៊ីលវីយ៉ូ ហ្គុតសាតូ ( Sivio Gonzato ) ប្រធាននាយកដ្ឋានទទួលបន្ទុកផ្នែកសិទ្ធិមនុស្សនិងប្រជាធិបតេយ្យ នៃសេវាកម្មទំនាក់ទំនងខាងក្រៅ របស់សហភាពអឺរ៉ុប នៅថ្ងៃទី២១ ខែ ឧសភា ឆ្នាំ ២០១៥ នៅវិមានរដ្ឋសភា។
មានប្រសាសន៍ក្រោយកិច្ចប្រជុំ ឯកឧត្តម ឈាង វុន បានគួសបញ្ជាក់ថា ជំនួបពិភាក្សានោះ បានផ្តោតជាសំខាន់ពីដំណើរការ កែទម្រង់ គណៈកម្មា- ធិការជាតិ រៀបចំការបោះឆ្នោត។ ការកែទម្រង់ប្រពន្ធ័បោះឆ្នោត ដែលកំពុងអនុវត្តបន្ទាប់ពីរដ្ឋសភា បានអនុម័តសេចក្តីស្នើច្បាប់ ស្តីពីការរៀបចំ និងការប្រព្រឹត្តទៅ នៃគណៈកម្មាធិការជាតិ រៀបចំការបោះឆ្នោត និងសេចក្តីស្នើច្បាប់ ស្តីពីការបោះឆ្នោត ជ្រើសតំាងតំណាងរាស្រ្ត។ និងបន្ទាប់ពីរដ្ឋសភាបានបោះឆ្នោត ជ្រើសតំាង ប្រធាន អនុប្រធាន និងសមាជិក គណៈកម្មាធិការជាតិរៀប ចំការបោះឆ្នោតរួចមក។
សហភាពអឺរ៉ុប បានប្រកាសថា នឹងជួយដល់គណៈកម្មារធិការជាតិ រៀបចំការបោះឆ្នោត ដើម្បីឲ្យស្ថាបន័មួយនេះ កាន់តែមានសមត្ថភាព ក្នុងការ រៀបចំការបោះឆ្នោត ដែលគ្រប់គណបក្សនយោបាយ និងប្រជាពលរដ្ឋទទួលយកបាន។ ឯកឧត្តម ឈាង វុន បានមានប្រសាសន៍ថា ការកែទម្រង់ប្រព័ន្ធបោះឆ្នោត គឺដើម្បីធានានូវចំនុចសំខាន់ពីរ។ ទី១គឺត្រូវធ្វើយ៉ាងណាអោយប្រជាពលរដ្ឋ អាចទៅបោះឆ្នោត ដោយសេរី និងយុតិ្តធម៌ និងទី២ គឺត្រូវធានាថា អ្នកមានសិទ្ធិបោះឆ្នោតអាចបោះឆ្នោតបានតែម្តង មិនអាចបោះឆ្នោតបានច្រើនដងឡើយ។
ឯកឧត្តម ឈាង វុន បានលើកឡើងថា បច្ចុប្បន្នគណៈកម្មាធិការជាតិរៀបចំការបោះឆ្នោត កំពុងត្រៀមធ្វើបច្ចុប្បន្នភាព បញ្ជីឈ្មោះអ្នកបោះឆ្នោត និង ការចុះឈ្មោះ អ្នកបោះឆ្នោតថ្មី តាមប្រព័ន្ធបច្ចេកវិទ្យា ហើយកិច្ចការនេះបានទទួលការស្វាគមន៍ ពីសហភាពអឺរ៉ុប។ ឯកឧត្តម ប្រធានគណៈកម្មាការទី៥ បានមានប្រសាសន៍បន្តថា សហភាពអឺរ៉ុប បានត្រៀមលក្ខណៈជួយដល់ គណៈកម្មាធិការជាតិរៀបចំការបោះឆ្នោត ក្នុងការបណ្តុះបណ្តាលដល់ មន្ត្រី របស់ គជប។
នៅក្នុងជំនួបពិភាក្សាការងារនោះ ឯកឧត្តម ឈាង វុន ក៍បានថ្លែងអំណរគុណ ចំពោះសហភាពអឺរ៉ុប ដែលបានរួមចំណែកយ៉ាងសំខាន់ ក្នុងជួយស្វែងរក សុខ សន្តិភាព ស្ថិរភាព និងការកសាងអភិវឌ្ឍ ប្រទេសកម្ពុជារហូតមក។
សូមបញ្ជាក់ថា បន្ទាប់ពីបានជួបពិភាក្សាការងារ ជាមួយ ឯកឧត្តម ឈាង វុន ហើយ គណៈប្រតិភូសហភាពអឺរ៉ុប បានបន្តប្រជុំពិភាក្សាការងារ ជាមួយ ឯកឧត្តម សុន ឆ័យ អនុប្រធានគណៈកម្មការទី២ នៃរដ្ឋសភា និងជាអតីតសមាជិកក្រុមការងារ វិសោធនកម្មច្បាប់បោះឆ្នោត បន្តទៀត៕
