នៅរសៀលថ្ងៃទី ១៨ខែឧសភា ឆ្នាំ២០១៥នៅវិមានរដ្ឋសភា ឯកឧត្តម ហ៊ុន ម៉ានីសមាជិក គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការនិងព័ត៌មាននៃរដ្ឋសភា និងជា សមាជិកសភាវ័យក្មេង របស់ប្រទេសកម្ពុជា នៃសហភាពអន្តរសភា ( I P U ) បានប្រជុំត្រៀមដើម្បី ទៅ ចូលរួម សន្និសីទពិភពលោក សម្រាប់សមាជិកសភាវ័យក្មេង របស់សហភាពអន្តរសភា ដែលគ្រោង នឹងប្រព្រឹត្ត ទៅពី ថ្ងៃទី២៦ ដល់ថ្ងៃ ទី៣០ ខែឧសភា ឆ្នាំ២០១៥ នៅទីក្រុងតូក្យូប្រទេសជប៉ុន។

ថ្លែងក្នុងកិច្ចប្រជុំត្រៀមឯកឧត្តម ហ៊ុន ម៉ានីបានមានប្រសាសន៍ថា សន្និសីទពិភពលោក សម្រាប់សមាជិកសភាវ័យក្មេងរបស់ សហភាពអន្តរសភាត្រូវ បានរៀបចំឡើងក្នុងគោលបំណងដើម្បីពង្រីកទំនាក់ ទំនងរវាងអ្នកនយោបាយវ័យក្មេងដើម្បីស្វែងរកដំណោះស្រាយ ប្រកបដោយភាពច្នៃប្រឌិតដើម្បីសម្រេចបាននូវសន្តិភាព និងភាពសំបូររុងរឿងនៅទូទាំងពិភពលោក។ ទន្ទឹមនឹងនោះសន្និសីទនេះនឹងផ្តល់ដល់ អ្នកចូលរួមនូវវេទិកានយោបាយមួយដែលដឹកនាំដោយយុវជនហើយពួកគេនឹងពិភាក្សាគ្នាដើម្បីកំណត់គោលនយោបាយព្រមទាំងសកម្មភាពនានា ដើម្បីដោះស្រាយបញ្ហាប្រឈមនានា ដែលយុវជននៅលើពិភពលោក កំពុងជួបប្រទះ។ដោយឡែកប្រធានបទសំខាន់ៗ ដែលនឹងត្រូវលើកយកមក ពិភាក្សាមានដូចជា
-តួនាទីយុវជនក្នុងការលុបបំបាត់ជម្លោះ- ការជះឥទ្ធិពលនៃវិបត្តិសេដ្ឋកិច្ច
-អំពើហិង្សាលើយុវជនជា ពិសេសស្រ្តីនិងកុមារី
-ចក្ខុវិស័យយុវជនក្នុងការចង់បានពិភពលោកមួយដែលមានភាពសំបូររុងរឿងនិង ការធ្វើអោយសម្រេចគោលដៅនេះ។

សូមបញ្ជាក់ថា សន្និសីទពិភពលោកសម្រាប់សមាជិកសភាវ័យក្មេងលើកទី១ ត្រូវបានធ្វើឡើង​នៅទីក្រុង ហ្សឺណែវប្រទេសស្វីស ក្នុងឆ្នាំ២០១៤ ក្រោមប្រធានបទ ការយកលទ្ធិប្រជាធិបតេយ្យមកអនុវត្ត​ជាក់ស្តែង ហើយមកទល់ពេលនេះគេរំពឹងថាសមាជិកសភាវ័យក្មេងចំនួន១៣០រូប​មកពី ទូទាំងពិភព​លោក​នឹងចូលរួមក្នុងព្រឹត្តិការណ៍នេះ។
អត្ថបទនិងរូបភាពពីនាយកដ្ឋានព័ត៌មាន