ឯកឧត្តមបណ្ឌិត ងួន ញ៉ិល អនុប្រធានទី២រដ្ឋសភានៃព្រះរាជាណាចក្រកម្ពុជា រួមជាមួយឯកឧត្តម លោកជំទាវ ជាសមាជិកព្រឹទ្ធសភា រដ្ឋសភា រាជរដ្ឋាភិបាល ថ្នាក់ដឹកនាំខេត្ត មន្រ្តីរាជការជុំវិញខេត្តនិងប្រជាពលរដ្ឋបានប្រារព្ធពិធីអបអរសារទរខួបទី១៥២ ទិវាពិភពលោកកាកបាទក្រហម អឌ្ឍចន្ទក្រហម ៨ឧសភា២០១៥ ក្រោមប្រធានបទ កម្លាំងមនុស្សធម៌គោលការណ៍គ្រឹះក្នុងសកម្មភាពដើម្បីស្វែងរកមូលនិធិ គាំទ្រដល់សកម្មភាព របស់សាខាកាកបាទក្រហមកម្ពុជាខេត្តកំពង់ធំ ដែលពិធីនេះបានប្រារព្ធធ្វើនាព្រឹកថ្ងៃទី១០ ខែឧសភា ឆ្នាំ២០១៥ នៅសាលប្រជុំសាលាខេត្តកំពង់ធំ។
ឯកឧត្តម អ៊ុត សំអន ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ធំបានធ្វើរបាយការណ៍ជម្រាបជូនអំពីសកម្មភាពការងារ របស់សាខាកាកបាទក្រហមកម្ពុជាខេត្តកំពង់ធំ ដោយគូសបញ្ជាក់ថា ក្នុងឆ្នាំ២០១៤កន្លងទៅនេះពិតមែនតែខេត្តកំពង់ធំ ពុំទទួលរងដោយគ្រោះ ទឹកជំនន់ធ្ងន់ធ្ងរក៏ដោយ ក៏សាខាកាកបាទក្រហមខេត្ត និងអនុសាខាស្រុក ក្រុង បានធ្វើសកម្មភាពជួយដល់ប្រជាពលរដ្ឋដែលជួបការលំបាក ខ្វះខាតនៅមូលដ្ឋានតាមសហគមន៍ ដោយបានផ្តល់ជំនួយមនុស្សធម៌ជាសម្ភារៈប្រើប្រាស់ គ្រឿងឧបភោគបរិភោគជាដើម។ ដោយមានការ ជួយឧបត្ថម្ភ\គាំទ្រពីកាកបាទក្រហមកម្ពុជា និងសប្បុរសជននានា បានធ្វើឲ្យសាខាកាកបាទក្រហមកម្ពុជាខេត្តកំពង់ធំ អាចធ្វើការឆ្លើយតបបានទាន់ពេល វេលាជូនដល់គ្រួសារប្រជាពលរដ្ឋរងគ្រោះ និងងាយរងគ្រោះបានចំនួន៣២៤៤ករណី ក្នុងនោះរួមមានអគ្គីភ័យឆេះផ្ទះ៤៥ខ្នង ខ្យល់ព្យុះខ្យល់កន្រ្តាក់រលំផ្ទះ៤៧ខ្នង របើកដំបូល២២២ខ្នង រងផលប៉ះពាល់១១៦ខ្នងអ្នករងគ្រោះដោយរន្ទះបាញ់ស្លាប់៧នាក់ របួស១៣នាក់ អ្នកលង់ទឹកស្លាប់៣០នាក់ ពស់ចឹកស្លាប់២នាក់ អ្នកផ្ទុកមេរោគអេដស៍៣នាក់ ទូរគតជននិងកុមារកំព្រា២៧នាក់ គ្រួសារក្រីក្រ១២១៩គ្រួសារ កូនភ្លោះនិងជនពិការ៧៧នាក់ រងគ្រោះដោយទឹកជំនន់៦៦៣នាក់ រងគ្រោះដោយគ្រាប់មីនស្លាប់និងរបួស៨នាក់ គ្រួសារក្រីក្រមានជំងឺស្លាប់២១នាក់ ពុលចំណីអាហារ៤២០នាក់ គ្រោះថ្នាក់ចរាចរណ៍៤នាក់ ស្រ្តីជួបការលំបាកដោយឆ្លងទន្លេ២៦នាក់ និងអ្នករងគ្រោះដោយបាក់ច្រាំងស្ទឹង៦គ្រួសារ ផងដែរ។
បន្ទាប់ពី ឯកឧត្តម ឈុន ឈន់ ប្រធានកិត្តិយសសាខាកាកបាទក្រហមកម្ពុជាខេត្តកំពង់ធំ បានអានសេចក្តីថ្លែងការរបស់សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា រួចមក ឯកឧត្តមបណ្ឌិតងួន ញ៉ិល បានមានប្រសាសន៍សំណេះសំណាលទៅកាន់អង្គពិធីថា ថ្ងៃនេះយើងប្រារព្ធពីធីអបអរសាទរខួបទី១៥២ទិវាពិភពលោកកាកបាទក្រហមអឌ្ឍចន្ទក្រហម៨ឧសភា ក្រោមប្រធានបទ កំលាំងមនុស្សធម៌ គោលការណ៍គ្រឹះក្នុងសកម្មភាពនៃការបង្កើតកាកបាទក្រហមកម្ពុជា ១៨ កុម្ភៈ ១៩៥៥ ១៨កុម្ភៈ២០១៥ ផងដែរ។
ឯកឧត្តមបណ្ឌិតបានបន្តទៀតថា ខួបទី១៥២ឆ្នាំនេះក៏ចង់ថ្លែងប្រាប់ឲ្យយើងគ្រប់គ្នាបានដឹង ពីអត្ថិភាព និងសកម្មភាព១៥២ឆ្នាំកន្លងមក ដែលអ្នកស្ម័គ្រចិត្តរាប់លាននាក់ និងអ្នកជំនាញរាប់សែននាក់ នៅក្នុងចលនាកាកបាទក្រហម អឌ្ឍចន្ទក្រហម បានរួមកម្លាំងគ្នាជាធ្លុងមួយ ផ្តល់នូវសេវាកម្មមនុស្សធម៌យ៉ាងច្រើនដើម្បីជួយដល់អ្នករងគ្រោះ និងសហគមន៍ងាយរងគ្រោះ នៅជុំវិញពិភពលោក បានយ៉ាងទាន់ពេលវេលា និងមានប្រសិទ្ធិភាព ដែលបានទប់ទល់ទៅនឹងអ្វីដែលហៅថាជាបញ្ហាប្រឈមនោះ។ ឯកឧត្តមបណ្ឌិតបានសង្កត់ធ្ងន់ថា បញ្ហាប្រឈមចំពោះមុខនឹងត្រូវដោះស្រាយរួមមានអំពើហិង្សានានា ការកើតមានជំងឺឆ្លងថ្មីៗ បញ្ហាគ្រោះថ្នាក់ចរាចរណ៍ បញ្ហាគ្រឿងញៀន រួមជាមួយនឹងបញ្ហាប្រឈមជាសកលមួយចំនួនទៀត ដែលបង្កឲ្យមានគ្រោះមហន្តរាយធំៗ ដូចជាគ្រោះទឹកជំនន់ គ្រោះរាំងស្ងួត និងជំងឺឆ្លងនានា ដែលបានធ្វើឲ្យប៉ះពាល់ទៅលើជីវភាពរស់នៅប្រចាំថ្ងៃរបស់ប្រជាជន ទៅតាមសហគមន៍មូលដ្ឋានធ្វើចំណាកស្រុក ការហូរចូលវប្បធម៌បរទេស និងបញ្ហានិន្នាការផ្នែកសាសនា ដែលបញ្ហាទាំងនេះយើងត្រូវរួមគ្នាគិតគូរនិងដោះស្រាយឲ្យទាន់ពេលវេលា ដើម្បីជួយសង្គ្រោះជីវិតជនងាយ រងគ្រោះនិងការពារ សេចក្តីថ្លៃថ្នូររបស់ពួកគេក្នុងនាមមនុស្សជាតិ។
ឯកឧត្តមបណ្ឌិតបានសម្តែងការកោតសរសើរចំពោះសាខាកាកបាទក្រហមខេត្ត ដែលកាន់តែមានសមត្ថភាពក្នុងការអភិបាល គ្រប់គ្រង និង ឆ្លើយតបគ្រោះមហន្តរាយ។ ជាមួយគ្នានេះឯកឧត្តមបណ្ឌិតបានសម្តែងការកោតសរសើរចំពោះរាជរដ្ឋាភិបាលដែលបានជួយគាំទ្រ ទាំងផ្នែក គោលនយោបាយ ច្បាប់ យន្តការគាំទ្រនានា ព្រមទាំងសម្ភារៈនិងថវិកា ជំរុញនិងលើកទឹកចិត្តដល់កាកបាទក្រហមកម្ពុជា ក្នុងការអនុវត្តនូវ យុទ្ធសាស្រ្តឆ្នាំ២០១១របស់ខ្លួន ដើម្បីសម្រេចដល់ឆ្នាំ២០២០បានជោគជ័យថ្មីៗថែមទៀត។
នៅក្នុងឱកាសនៃការប្រារព្ធពិធីអបអរសាទរខួបទី១៥២ ទិវាពិភពលោកកាកបាទក្រហមអឌ្ឍចន្ទក្រហម៨ឧសភា២០១៥នេះ សាខាកាកបាទក្រហម ខេត្តកំពង់ធំបានទទួលការចូលរួមឧបត្ថម្ភថវិកា ពីសប្បុរសជននានា សរុបចំនួន៧ម៉ឺន៥ពាន់៣៦២ដុល្លារអាមេរិក ក្នុងនោះឯកឧត្តមបណ្ឌិត ងួន ញ៉ិល បានចូលរួមថវិការបស់ឯកឧត្តម ចំនួន៧ពាន់ដុល្លាអាមេរិកផងដែរ សម្រាប់បំរើដល់សកម្មភាពការងារ និងការគ្រប់គ្រងគ្រោះមហន្តរាយនានាក្នុងខេត្តកំពង់ធំ៕
អត្ថបទនិងរូបភាពពីនាយកដ្ឋានព័ត៌មាន
